Manchester United chuan Denmark international striker Rasmus Hojlund lalut turin Serie A club Atalanta nen Pound maktaduai 72 in inremna an nei.
Kum 20 mi hian Old Trafford hi Pound maktaduai 64 in a zawm phawt anga, a khelhdan a zirin Pound maktaduai 8 pek belh theih an ni ang.
United-ah hian Hojlund hian kum nga contract a ziak dawn a, kum khat ziah belh theihna a nei ang. Season liamta khan August thlaah Atalanta hi a zawm a, match 34 atangin an tan goal 10 a khung.
Tun nipuiah Manchester United manager Erik ten Hag-a’n a player duh a lakluh pathumna a ni dawn a, midfielder Mason Mount chu Chelsea atangin Pound maktaduai 55 in a lalut tawh a, Inter Milan goalkeeper Andre Onana pawh Pound maktaduai 47.2 in an lalut fel tawh.
Hojlund hi Ten Hag-a’n a striker thar ni tura a duh ber a ni a, United lamin a man hi Pound maktaduai 60 hnuailam ni thei se an duh viau laiin an mamawhna a san tawh avangin Italian club hi an dawr rei ta lo.
England striker Harry Kane chu sawilan tel nimahsela United hian a man a to dawn bakah Tottenham nen indawr a harsa dawn niin an hria a, hei vang hian Hojlund hi thlang felin midang an ngaihven zui lo.
Denmark taka vawi ruk inkhel tawh a goal ruk khung tawh Hojlund hian kum 17 mi a nihin kum 2020 khan FC Copenhagen tan a inkhel tan a, kum hnih hnuah Austrian club Sturm Graz zawmin thla ruk hnuah Atalanta in an lalut a ni.
United hian vawiinah a insawnna a lehkha pawimawhte tihfel a, medical neih fel thuai an tum bawk a, tun kartawp a Lens leh Athletic Bilbao an hmachhawn leh turah tel ve tir hman an tum.