Aizawl : Core Committee on Mission Chhanchhuahna (Alternative Income Generation Programme against Illicit Alcohol Manufacturing for Rangvamual and Phunchawng) hmalakna kal zelah Zirtawpni khan Rangvamual Local Council House leh Phunchawng Presbyterian Kohhran Naupang Sunday School Hall-ah inzirtirna hun buatsaih a ni a, Help Desk siam a ni bawk.
He hunah hian, 19th July 2023-a Aizawl District Bawrhsap Dr. Lalhriatzuali Ralte kaihhruaina hnuaia Core Committee on Mission Chhanchhuahna-in a lo rel tawh angin, he mission pawimawh tak chungchang inhrilhhriatna leh hemi atana kawng inkawhhmuhna hun (help desk) hman a ni.
Rangvamual leh Phunchawng veng atangin chhungkaw aiawh thahnem tak he hunah hian an tel thei a. Eizawnna mumal neilo, zu zawrh leh danin a phalloh te hmanga eizawng thinte chhanchhuahna project hi tha taka kalpui tum a ni a. Tunah hian, a bul tan nan MSDRB (SWTA Dept), LESDE dept., UD&PA dept., AMC, KVIB, Lead Bank leh SBI-RSETI te’n an scheme hrang hrang, loan leh service dang dangte hmanga eizawnna hmuh theih dan te, bul tan tur thil tul hriat ngai te inhrilhna hun atangin hmalak tan chhoh mek a ni tih sorkar thuchhuah chuan a tarlang.
Department te leh Bank hrang hrang aiawh mi 19 ten zirtirna an pe a. Inhrilhfiah ngaite inhrilhfiahna hun hman a nih bakah , sorkar scheme leh loan hmanga tanpui an nih theih dan tur te sawipui an ni a. Rangvamual leh phunchawng a awareness programme leh Help Desk neihah hian mi 170 chuang an tel thei a ni.
Mission Chhanchhuahna atan hian Core Committee leh Working Committee din fel tawh a ni a, Core Committee ah SP Aizawl chu Co-Chairman niin he mission chhanchhuahna turin a kaihhnawih department hrang hrang bakah kohhran leh tlawmngai pawl aiawh leh rilru lama harsatna enkawl thiam bikte pawh an tel tih sorkar thuchhuah chuan a tarlang bawk.