AIZAWL: Mizoram oilpalm farmer-ten hma an sawn a, kum khatah hralhna atangin Rs. nuai 40-60 la lut mi eng emaw zat an awm.
Mizorama oilpalm rah leikhawmnaa Bukvannei, Kolasib district-a oilpalm hriak herchhuak mektu, Godrej Agrovet Company buatsaihin Vivanta Hotel, Guwahati-a Media Conference neih zawh takah, Godrej Company neitu leh executive director ni bawk, Burjis Godrej chuan India rama oilpalm hriak ei zaa 80 (80%) hi ram dang atanga lak luh a nih thu a sawi a. Oilpalm chu hriat ei chi tharchhuaha thlai hrang hrang zingah, a ram leilung awh zau zawng (total area cover) a tehin oil thlawr hlawk ber a nih thu a sawi.
Godrej chuan ram dang atanga hriak ei chi lak luh teuh teuh tihtlem nan leh India ram a intodelh nan oilpalm that duhna hmun hmarchhakah hma lak tum mek a nih thu a sawi a. Godrej Company hian Assam-a Cachar, Karimganj leh Hailakandi bakah Manipur, Nagaland leh Tripura-ah te hma an la dawn niin a sawi.
He hunah mi thiam hrang hrang thusawi tura an sawm zingah Sougata Niyogi, CEO chuan oilpalm chin hlawkna hrang hrang a sawi bakah oilpalm scheme thar, NMEO-OP chuan farmer-te tana tanpuina chi hrang hrang a ken tam bik thu te sawiin, Mizoram sorkarin oilpalm seed garden a siam mek chu hmarchhaka seed garden hmasa ber a nih thu te, kum 2025 atang chuan he hmun atangin hmarchhaka oilpalm huan siamtuten an tangkaipui tur thu te a sawi bawk.
Mamit district-a oilpalm farmer, Vanlalruata Pachuau pawhin media mite zawhna chhangin Mizorama oilpalm farmer-ten an hlawkpui dan leh an hmasawn dan te sawiin, an hmunhmain a zir loh avangin mi thenkhatin hnualsuat mah se scheme thar, NMEO-OP kalpui a nih atangin tunah chuan a hlawkzia hriaa hma lak thar tum mi tam tak an awm thu te, oilpalm an hralhna atangin kum khatah Rs. nuai 5 – 10 la lut chhungkaw tam tak an awm thu te, Rs. nuai 40 – 60 la lut pawh mi eng emaw zat an awm thu te a sawi a. Hmana BPL thin kha oilpalm avangin tunah chuan middle class-ah chhungkaw tam tak an awm tawh tih a sawi bawk.
He media conference-ah hian Assam media-te chu hmarchhaka oilpalm hmalakna kalpui dan tur chungchang hrilhfiah an ni a. He hunah hian hmarchhaka oilpalm hlawhtlinpui mek, Kolasib leh Mamit district, Mizoram atangin farmer pakhat ve ve leh Kolasib district media atangin R Lalhmingthanga, DDK Stringer-te chu sawm an nih angin an tel a ni.