Zoram People’s Movemnet (ZPM) chuan term exam hun dawn thleng pawha zirlai naupangten zirlaibu an la dawng kim thei lo chu Mizoram sorkarin zirlaite hmakhua, zirna in leh zirtirtute a ngaihthahzia a tilang chiang hle niin an sawi.
Inrinni khan Aizawl Press Club-ah ZPM Media, IT & Publicity department-in thu thar thehdarhtute an kawm a. An General Secretary Eddy Zosangliana Colney chuan Samagra Shiksha hnuaia a thlawna zirlaibu sem thinah zirlai naupangten zirlaibu an la dawn kim loh chungchangah thawktute thil awmzia an zawtfiah tih a sawi a. Tun dinhmunah Mizoram pumah Samagra Shiksha hnuaia a thlawna zirlaibu dawng tur zirlai naupang nuai khat bawr vel an awm mek a. Zirlai sang telin lehkhabu an la dawng kimlo hi a lung chhiatthlak an tih thu sawiin, “Hei hian a lantir chu kan sorkar hian zirna a ngaihthah hle a ni tih a finfiah a ni,” a ti.
April 5, 2023 daih tawh khan academic session tan a ni tawh tih sawiin Eddy Zosangliana Colney chuan, “Hetiang hi a nih laiin July thla tawp, term exam dawn thleng pawha zirlai naupangten zirlaibu sorkar atanga an la dawng kim thei lo hi enliam mai mai chi a ni tawh lovin kan hria,” tiin, sorkarin chhuanlam hrang hrang siam ve bawk thin mah se, a bul ber chu Mizoram sorkarin zirlaite hmakhua leh zirna inte a ngaihsak tawk loh vang a ni a. Heng harsatnate hi a rang lama chin fel dan zawng turin sorkar an phut thu a sawi.
Eddy Zosangliana Colney chuan thawktute an zawhchianna atanga a lan danin, tun dinhmunah hian (raltlan tel lovin) Class IV Hindi sem tur copy 600 velin a indaih lo mek a, Class VII Mathematics copy 3,000 velin an indaih lo mek bawk a. Class II Mizo (Kumtluang 2) chu copy 1,500 vel bawrin an indaih lo mek bawk tih sawiin, “Hetiang hi a nih laia, a aia la manganthlak lehzual chu heng zirlaibu indaihlohna te hi zirlai naupang ten hmun dang atanga anmahni sum seng pawha lei duh pawh nise, lei tur la awm lo lehzel te hi a ni,” a ti.
“A hun taka zirlai naupangten zirlaibu an dawn theih nan print order-te pek hma theih ni se, zirlaibu sem turte hi kum liam ta UDISE (Unified District Information System for Education Plus) report (enrollment) ang mil zela siam thin a nih tho avangin print zat tur hi a tlangpui a hriat lawk theih tura ngaih a nih laia kum tin a hun taka dawng hman lo tura print a ni thin hi thuneituten ennawn thuai se kan duh hle,” a ti bawk.
Kum dangah pawh zirlaibu hi a hun taka pek an ni ngai lo va, kum tin an dawng tlai thin tih a sawi a. Lehkhabu sem reng reng a hlawma pek ni lovin, a zeuh zeuhin an sem thin a, vawiin thlenga thuneituten an la ruahman fel thei lo chu pawi an tih thu a sawi a. Zirtirtute pawh an hlawh hi May, June leh July (thla thum chhung) an pe thei lo mek a. Hei hian Mizoram sorkarin zirlaite hmakhua, zirna in leh zirtirtute a ngaihthahzia a tilang chiang hleah an ngaih thu ZPM Media, IT & Publicity General Secretary chuan a sawi.