United States sipaite chuan Kabul thlawhna tumhmun beihna thleng tur an venna lama drone hmanga mi an kahnaa Afghan civil mi pakua an thi nia sawi chu a chhui chiang dawn.
US Central Command chuan drone-a kah an tum hi lirtheia chuang mi pakhat, Afghan branch Islamic State firfiak pawla mi a nih thu a sawi.
Engtin nge civil mite an thih tel theih tih erawh hriat chian a ni lo.
Kabul-a chengte chuan thi zingah hian naupang pali pawh an tel niin an sawi.
An chhungte zinga pakhat chuan US network CNN hnenah mi pakuate hi chhungkaw khata mi an nih thu a sawi bawk.
US Central Command chuan car an kah fuh hnuah khan thil chak tak puak a awm ngei thu an sawi ve bawk.
“Kha thil puak na tak kha car-a phurh puak theih a nih a rinawm a, kha khan thihna dang a thlen ve thei a ni,” an ti.
Ningania Kabul tumhmun thihchilh bomb tihpuaha mi 100 chuang leh US sipai 13 an thih hnuah khan US hi a fimkhur hle a. Kha beihna khan Afghanistan ram chhunga Islamic State chuan an tihah an chhal.
Civil mi thi tam zawk hi August 15-a Taliban kuta an khawpui a tluk hnua ram pawna thlawhnaa chhuah theih inbeiseite an ni.
US chuan August 31-a inthiar chhuah hman vek a tum thu a sawi nawn mek rualin Afghanistan-ah hian beihna lian dang a thleng thei reng tih a sawi.
Thawhtanni pawh khan US anti-missile system chuan khawpui atanga tumhmun lam hawia rocket thlawk chu a kap thla niin thuneitu pakhat chuan Reuters news agency a hrilh.
Tual chhung chanchinbute pawhin video leh thlalak an thehdarhah Kabul khawpuia in chung lawka rocket thlawk leh khawlaia car kang an tilang hlawm.
US leh Afghan mi thi leh hliam an awm lo nia hriat a ni.
US hian Kabul tumhmun hi beihna dang laka a him zawk nan tiin anti-rocket leh mortar system an inchhawp a. Tumhmunah hian venhim hna thawkin sipai 5,000 vel an la dah a ni.