Aizawl : Lunglei District Task Force for Immunization, an chairman Lunglei Bawrhsap Ramdinliani hova thukhawmin Intensified Mission Indradhanush (IMI) 5.0 Vaccine pek dan tur an sawiho.
Naupang kum nga hnuailam leh Nu, naupaite hnena natna hri laka invenlawkna vaccine pek beihpui thlakna Intensified Mission Indradhanush 5.0 chu Lunglei District pum- puia kalpui turin ni 7th August 2023 zing 10:30 ah DC Conference Hall, Lunglei-ah hawn ni se, an ti a. Hemi hnu hian Lungsen PHC, Tlabung SDH, Bunghmun PHC leh Hnahthial CHC a khaw 41 ah vaccine pek beihpui thlak tan nghal ni se, an ti.
Ruahman dan chuan vaccine pek beihpui hi thawh thuma neih tum niin, 7th – 12th August, 11st-16th September leh 9th -14th October 2023 -ah te neih tum a ni a. Vaccine la thei tur dapchhuah mek an ni.
District Task Force for Immunization tarlan danin chuan Lunglei district-ah Naupang vaccine la thei kum 2 hnuailam 230, kum 2 – kum 5 chin 136 leh Nu, naupai 42 an awm mek a. 2022 – 2023 Lunglei District Routine Immunization hmalakna in a tarlan danin Nu naupai lai 2782 leh Naupang 2662 te hnenah vaccine hi pek an ni.
Intensified Mission Indradhanush hi sorkar laipui hmalakna niin, Mizoramah chuan Lunglei, Champhai, Kolasib, Lawngtlai leh Mamit District-ah te kalpui mek a ni.