Champhai Grape Grower Society (CGGS) chuan grape tui sawr sa hralh chhuah kawnga harsatna an tawh thin chu tun hnaia RR Sales nen inremna an ziah hnuah erawh sutkian a nih an beisei a, grape tui sawr an hralh that an beisei.
CGGS hruaituten The Zozam Times an hrilh danin, winery-ah hian wine sawr sa litre 1,70,000 bakah Champwine bottle 4,800 zet kawl lai an nei a, Champwine-te hi an hralh that hleih theih loh avangin mangang viau mah se tun hnaia RR Sales nen inremna an ziah hnuah an harsatna chu sutkian theih an inbeisei.
Tunlai hian CGGS chuan grape thar chhuahte winery hmunah an lei mek a, kar tin Thawhlehni leh Ninganiah grape hi leiin, kumin bikah hian society member ni lote grape tharte pawh an lei tel.
CGGS hruaitute chuan, kuminah tum li grape tharte an lei tawh a, an lei tawh zawng zawng hi quintal 610 a tling tawh tih an sawi a, kumin chhung hian quintal 1,200 zet lei theih an in beisei tih an sawi.
Hetihlai hian Hnahlan lamah pawh grape tharte lei mek a ni a, quintal 620 an lei tawh a, society member ta bakah Hnahlan khua leh a chhehvela grape chingtute atangin a man pangngaiin an leisak bawk a. Grape hi kg-ah Rs. 60-in an lei a ni.
Hnahlan winery chuan vendor 46-te hnenah a hlawmin an hralh chhuak thin a, vendor zingah a nihna tur anga hma la lo an awm avangin a hralh chhuah kawngah harsatna an tawk tih winery-a thawkte chuan an sawi a ni.