• Zirsangkima

Kum 1992 thlasik zíng ni chhuak tang ut chuan ka thlenna hotel pindan parda chu a rawn chhun tlang a—harh loh theih a ni lo. Kan band Bon Jovi chuan “Keep the Faith tour” neiin ram hrang hrang kan fang a, US-ah ’ngawt pawh khaw hrang hrang kan tlawh ta. Tûnah hian Los Angeles (LA)-ah kan chám mék a ni.

Bottle of vodka’s still lodged in my head …

Chu zíng ni rawn chhuak chuan ka pawi a sawi ni hian ka hre tlat a. Nizan lama ka vodka in luat chuan ka luak a pawt a, ka lú leh ka taksa a la fan ngut ngut a—ka la kai chhú a nih ber chu! Ka lú a rit lúk a, thlan fímin min bual ban chup bawk a, ka sahãl huam huam mai. Ka rilrua LA nula sam buangho, a ngíl leh kir, pian khal deuh leh feré ve fé fé lo lang zúr zutho, chin lëm nei loa min zar buaitute chuan ka lú an ti hai zual ni ten ka hre bawk a. Ka awm dàn chu tawngkam khata sawi tùr ni se, “Ning!” tih hi ka hmang ngei ang!

As I dream about movies …

Chutih lai chuan ka zai thiam ngaih sàn, kum 1971-a boral tawh, Jim Morrison kha ka hre chhuak thut a—a hun laia concert leh tour vêla a pentàwn nasat thin dàn tùrte nèn. Amah kha The Doors band khaipa leh an zaitupa a ni a. Mahse, nula, zú leh ruihhlo avàngin, a vàng lai tak, kum 27 mi a nihin bual inah a ruang an chhar a, “The 27 Club” member a ni ve ta mai a nih kha! (“The 27 Club” hi hun dangah kan la sawi ang)

Ka rilrua awm zâwk taka chu, Val Kilmmer-a’n a lem a channa movie, “The Doors” kha a ni; a kawppui lemah Meg Ryan pawh a chan ve nghe nghe kha. Kei pawh hi, Jim Morrison-a khawsak ang khán—ni zàn ang khán—eng mah pawisak nei loin “lane tãwi” leh “lãwilo dàwrpui” lam hrútin, ka nupui pawh hre chang lék loin, LA nula sam buangho kha khawsakpuiin nawm chen kha ka khawvêl ni ve ta se la, ka chan tùr chu a ropui viau lo ang. Chutah, ka thih hnuah khatianga ka awm dàn kha movie-in siam ta se la … Ka thih dàn ropui lo tak, movie-a an siam tùr chu ka duh rêng rêng lo—ka duh lo tak zet!

Lu na lúk chuan ka tho lui a. Ka inphih harh a. Ka thlenna hotel pindan zau tak maia piano hlui tawh tak lo inhúng ruau lam chu ka pan a. Hotel pindan viltuten, chü piano chu inneihnaa an hman thin a ni thu min hrilh tawh. Chu chuan ka rilru a ti thar ta thut ta a …

And the truth is …

Kum thum kalta, April 29, 1989-a mipui náwlpui hriat kan hlauh avànga Graceland Wedding Chapel, Las Vegas-a inneih thu ka tiampui, tùna kan fa hmasa ber tùr paia rai teuh Dorothea chu ka ngai thar ngawih ngawih a. Ka ngaihzia hi hlaa chantír tumin, pen leh ziak-loh-puan nèn piano chu ka thut chilh ta a ni.

Dorothea kha! Dorothea Hurley a nih lai, New Jersey-a Sayreville War Memorial High School-a kan kal laia history subject kan exam tuma a chhànna min en tawntírtu kha … ka vawi khat hmuhnaa thìr híp theiin thïr a hìp beh chat ang maia min híp nghâl chattu, vawiina Dorothea Bongiovi a nih hnu thleng pawha min la híp bet rengtu hi—ka ngai a, ka thlahlel a, a kianga awm a, bula zàla tàl hlàn ka nghâkhlel tak zet a ni. Hringnuna thil hlú ber ber, hmangaihna leh rinna zawng zawngte hi, ani hnênah ka hlàn fai vek tawh a. Tûkin thleng pawh hian, hei hi thu dik a la ni reng: ‘Bawihte, ka ngai che a, ka mamawh tak zet zet che!’ tih hi. Mahse, tûnah erawh, km 3,930 laiin kan kár min dang rih si!

Blind love is true

Kan album thar, “Keep the Faith” tih làr nán concert kan nei chàwl lo a, kan la zo mai dáwn lo lehnghâl! Mahse, ka ke pèn tin mai hian in lam min hnaihtír tih erawh ka hria. Tour tan tirh lam te kha chuan, New Jersey ka chhuahsan hlim a ni bawk a; mipui an tama an sahâwk zawh poh leh ka phür êm êm thin kha a ni a. Mahse, tûnah erawh ka ni tawh hauh lo! Taksa a hah bâkah lunglèn hrî ka vei tel leh ta zêl bawk si a!

In leh kawppui ngaih lunglènna te hi natna chi khat chu a ni ve rëng alãwm. Chû natna chu alãwm, miten, “Jon Bon Jovi” tia an hmuh châk êm êm thinin veia ka tawrh mék chu! He lunglèn natna avàng hian rock star nun hi ka ning tawh a, ka hnë a, bànsan ka tum … ka tihna phei chu a ni lo; min ngai sánga, stadium khat tlat mipui síng chuangte min pawhna aiin, mi pakhat, Dorothea min pawhna hi a na zâwk a, a chak zâwk bawk, ka tihna mai a ni.

Dorothea tawngkam, a aw rî ringawt pawh hriat châkin ka tui hãl a. Payphone (PCO) atanga amah biak nán, ka sum leh ka neih rohlu zawng zawng pawh sèn ral vek ka pawi ti lo a. Mahse, hun ka nei thei si lo! Sáw lai telephone hruia sava fu mékte sawn, kan thu hãw lam leh kal lam te, kan inngaihna thute hi min kensak thei se ka va ti tak êm! Mahse, ka lunglèn natna leh kan inkár mél sãng hnih chuang min dangtute hian, kan inhmangaihna leh kan inthlâkhlelhna te, kan rilru leh kan taksa kan inhlan dunna zawng zawngte hi an dang zo chuang lo tih ka hria. Ka mit ka chhíng a, zawi tê-in, ‘Bawihte, hmu thei loin khawih thei rih lo che mah ila, ka hmangaihna che hi chuan a hlat ngai lo che a, a tìr ang khán a la thar reng a, a la thianghlim reng asin!’ tiin ka inhrilh ru sap a …

Hotel bar’s hangover whiskey’s gone dry

Kum 1971-a tih chhuah, Marianne Faithfull-i sak, “The Ballad of Lucy Jordan” kha ka rilruah a rawn lang zawk mai—kum 37 mi Lucy Jordan, a ni tin hun hman dàn ngai reng a nin lutuk avànga in chhàwng sáng atanga zuang thlaa mahni inti hlum ta kha. Khã Lucy kha, ‘Bar-a thawk, kawppui hmu zo lo, duh ve si ni ta se,’ tiin ka zëldin zui a. Mahni inhnem nán tiin whiskey in tawk tum ta se; mahse, whiskey rêng rêng awm tawh si lo se … Kei hi min rawn mit sìr zeuh se, ‘Lucy Bawihte, ka kiangah hian lo hnai ta che,’ tiin Lucy mangang leh nun ning lutuk chu, lènpuia leupuiah sáwm ta ila; Lucy chu, làwm avàngin a thi thei hial ang a … ti te’n ka zëldin a nih chu. Chutiang chiah chuan Dorothea, tûnah hian ka kiangah rawn awm thut la, làwm avàngin ka thi thei hialin a nia ka inrin ni!

To stand in her spotlight again …

Hla ka ziah mék lai chuan kan tour manager, Paul Korzilius [“mistress” tia hla thua tehkhin thu (metaphor)-a a hman] chuan show (“spotlight”) tan a hun leh hnaih tawh avànga insiam tùrin min rawn hrilh leh ta! Bawihte, tûnah hian stadium khat tlat mipui, a sãng a sãng, a sïng a sïng zi nuai nuai hmaah, rimawi chhepchher chi tinréng kárah ka inlan leh dáwn. Kan zi leh hut hut ang. Mahse maw, ka khawhar loh ring lul suh ang che.
A ni asin Dorothea, nang ka ngaihna che leh i kianga nun zalèn hman ka thlâkhlelhna hi, hêng mipuite hian an hnawt tiau zo mawlh lo! Chumi finfiahna chu mi dang va hriattír kher pawh tül ka ti lo. A chhan chu, ka hmangaihna leh i tána ka inpêkna hi, nang—a hre tùr berin i hre miau alãwm maw le …

He lei hrehawm leh thlalèr khawharah hian, Bawihte … i kianga zàla hlimna famkim hmuh hlàn ka va nghâkhlel tak êm! Rose pár rimtui chék anga rimtuina hmun awm chhun chu i kiangah chauh a ni si a. Mahse, tûnah rih chuan, chu hmun chu ka hlat a, ka na ngawih ngawih a nih hi!

Ka duh ber Dorothea, Pathian Thlarau Thianghlimin min chèn chilh reng ang hian min chèn chilh reng la ka ti ngawih ngawih che a; hlimnain a chhùn khahna ram, hmangaihna famkim awmna, inpumpêk tawnna hmun, “Bed of Roses”-a zàltír hlàn che ka va nghâkhlel êm êm tak êm!

•••

“Bed Of Roses”

– Bon Jovi

Sitting here wasted and wounded at this old piano,
Trying hard to capture the moment this morning I don’t know
‘Cause a bottle of vodka’s still lodged in my head,
And some blonde gave me nightmares.
I think that she’s still in my bed.
As I dream about movies
They won’t make of me when I’m dead.

With an ironclad fist I wake up and French-kiss the morning
While some marching band keeps its own beat in my head while we’re talking
About all of the things that I long to believe:
About love, the truth, what you mean to me.
And the truth is,
Baby, you’re all that I need.

I wanna lay you down in a bed of roses,
For tonight I’ll sleep on a bed of nails.
Oh, I wanna be just as close as the Holy Ghost is,
And lay you down on a bed of roses.

Well, I’m so far away.
Each step that I take is on my way home.
A king’s ransom in dimes I’d give each night to see through this pay-phone.
Still I run out of time or it’s hard to get through.
‘Til the bird on the wire flies me back to you
I’ll just close my eyes and whisper,
“Baby, blind love is true.”

Well, this hotel bar’s hangover whiskey’s gone dry.
The barkeeper’s wig’s crooked and she’s giving me the eye.
Well, I might have said yeah
But I laughed so hard I think I died.

Now as you close your eyes
Know I’ll be thinking about you.
While my mistress—she calls me
To stand in her spotlight again.

Tonight I won’t be alone,
But you know that don’t mean I’m not lonely.
I’ve got nothing to prove
For it’s you that I’d die to defend.

Jon Bon Jovi leh Dorothea Hurley

(“They give love, a GOOD name!”)

Khawvêla mi làr, celebrity zíngah hian rei tak inneia nghet taka invuan hi váng tak an ni! ‘Hollywood nun’ leh ‘nupa inthen’ hi a inzawm tlat nge, fashion leh thil trending-ah an ngai nge ni an intih hmuh zâwk—nupui pasal an innei sek a, an inthen leh zêl tho a nih khu! Mahse, kan sawi Jon Bon Jovi leh Dorothea Hurley te nupa erawh hi chuan, kumin April thla khán an inneih cham kum 34-na an làwm ta reng mai.

Kum 1980 a ni a. Rock star a nih hmaa a hming put thin, a pianpui hming John Francis Bongiovi Jr. chu kum 18 mi niin an khua, New Jersey-a Sayreville War Memorial High School naupang ve mai a ni. Chû high school-a kal ve tho, Donald leh Dororthy te fanu, Dorothea Hurley chu a páwlpui, kum 18 mi ve tho a ni. Tum khat History subject an test tumin Jon chuan Dorothea ziah sa chu a entawn a. Chu chu a hmél a vawi khat hmuhna a ni. Mahse, Jon chuan, ‘Vawi khat a hmél ka hmuh rualin min híp nghâl a; kum 43 hnu, vawiin thleng hian khami tuma min hìpna kha a la reh miah lo!’ a ti.

Mahse, an inngaizáwng nghâl chuang miah lo! Dorothea chu Jon-a thian tha ber Bobby-a bialnu a ni miau a. Thian tha tak angin kum hnih chhúng an inkàwm a. Kum 1982-ah, kum 20 an tlin kumin, Jon chuan a thianpa bialnu chu a “nihpui” ta a nih chu!

Kum 1983-ah Jon Bongiovi chuan a naupan lai atanga a sikul kalpui leh a thianpa, David Bryan nèn rock band din tumin music lama tawnhriat ngah tawh, Richie Sambora an sáwm a. An unaute leh an thian dang dang kal tlangin Alec John Such leh Tico Torres te nèn, “Bon Jovi” an din ta a. 80s chhoah an band chuan mipui ngaih sàn an hlawh chho hle a. Hêng hun chhúng zawng hian Jon-a hnunga mi pawimawh tak, a tána ding reng thin leh amah fuih phür reng thintu chu, Dorothea Hurley hi a ni. Jon-a tuina leh a lo suangtuah thin ram a thlen theihna tùr a nih dáwn chuan, a tán hun ãwl nei lo mah se, a lung ni lo ngai lo a, hrehawm mah se, a tuar lui tâng tâng thin.

An làr vàng lai tak, “The New Jersey Syndicate Tour” an neih laiin, Los Angeles-ah an chàwl zawk a. Chu chu remchángah lain Jon hian a rûkin Las Vegas lam a pan a. Mipui leh fan-te zar buai loh tùrin Graceland Wedding Chapel-ah, April 29, 1989 khán Dorothea Hurley nèn hian an inkutsuih ta a ni.

Fanu pakhat, Stephanie Rose Bongiovi (kum 30), leh fapa pathum, Jacob Hurley Bongiovi (28), Romeo Jon Bongiovi (21) leh Jesse Bongiovi (19) te an nei. Jacob,“Jake” tia an koh hian kuminah, model leh “Stranger Things” serial changtunu, Millie Bobby Brown chu a inhualpui zân tawh a ni.

Jon Bon Jovi te nupa hi, ruih theih thil leh zú leh saa chêt buai leh hming chhiat sawi tùr an awm lo. Mahse la, an fanu neih chhun Stephanie Rose erawhin a nu leh pate kawng zawh ang a zawh vek bîk lo! Kum 2012-a college a kal tan tirh, kum 20 a tlin dáwn kumin drugs (heroin) overdose avàngin nikhaw hre loin a awm a. A harh chhuak tawh dáwn lo emaw an tih hnuah damdawi in emergency room-ah a harh chhuak leh hlauh a ni.

Hetih lai hian a pa hi inah a awm lo a. Damdawi in atanga a phone call dawn chu, ‘Ka pian tirh atã phone call ka dawn tawh azawngah ngaihthlâk a la hrehawm ber!’ a ti hial! ‘Ka fate entawn tlâk leh an entawn tùra nun hman hi tâwkah ka ngai mai thin a; mahse, an kianga ka awm hi an mamawh tel a ni tih ka hre chhuak,’ Jon chuan a ti. A fanu hi hrema hau loin, a lo tlâkchham thin hmangaihna nèn a enkawl zui a, ‘Mi sual a ni lo, hmeichhe pangngai ve tho a ni. Mi dang angin thil a lo ti sual ve palh a ni. Ka kianga awm tam hi a mamawh ber chu a ni zâwk,’ tiin a fate kiangah a hun tam zâwk a hman zui phah nghe nghe a ni.

A nu leh pate hming la kawpa Dorothea Hurley ni thin, vawiina Dorothea Bongiovi ni ta hi New Jersey-a piang leh sei lian ve tho a ni a. Karate-a fourth-degree black belt nei pha ngat niin Karate zirtirtu a ni thin. Rilru kal khat nei mi niin mi dangte tanpui duhna rilru lian tak nei mi a ni. Kum 2019 December thla khân, a pasal Jon Bon Jovi nèn New Jersey khawpui hmun hnihah restaurant “JBJ Soul Kitchen” an hawng a. Ei tùr nei lote tán a thlàwnin ei tùr an pe thin. Anmahni dàwrtute chu, an thil ei man sum pêk tùr an neih chauhin an ei man an laksak thin. Covid19 avànga khawvêl pum a buai lai khân, mi dangte tanpui nán an hun tam zâwk an hmang thin a. An nupa hian ei rawng báwltuah an tang mai thin a ni. Tin, an nupa hian America ram chhúng hmun hrang hrangah chènna tùr in nei lote tán in sãng chuang an pe tawh bawk.

Kumin hi an inneih cham, kum 34-na a ni ta. Mi lãr hetianga rei innei hi an váng viau mai. An inneih rei chhan an zawh apianga an chhàn thinna chu, ‘Kan inhriat thiam tawnna hi a ni,’ an ti thin. People magazine-in kum 2016-a an interview tumin, Jon Bon Jovi chuan, ‘Dorothea hi ‘glue’ anga min chàr bet tlattu a ni. Hriau leh a beng a inzawm tlat ang hian chhúngkua min phuarkhâwm tlat thin a. Ka tán bîk phei chuan lungpui (rock) nghet tak a ni,’ tiin a nupui hi a fak hle. ‘Ka nupui hian engkim a thawk vek a; keiin hming thatna ka lo tél ve chauh thin a ni,’ a ti bawk.

Anni nupa hian alãwm, hmangaihna hming ti thaa ti mawi chu le … “You give love, a GOOD name!” tih hla satute an ni e!