Hmeichhe tennis star Iga Swiatek leh mipa German star Alexander Zverev te chuan an ramah hnehna an chang a, tualchhung title pawimawh an la.
Polish star, hmeichhe world number one ni lai Swiatek hian German mi Laura Siegemund 6-0 6-1 chu Warsaw-ah a hneh a. Poland Open-ah a champion.
Swiatek hian Inrinni zana an inkhel chu court tih enna a that tawk loh avanga sawn hlat a nih hnuah Pathianni khan an khel zova. Nikhatah vawi hnih hnehna a chang.
Sigemund lakah hian hnehna chang turin minute 68 bak a mamawh lova, break point vawikhatmah hmachhawn lovin a khingpui hian a service a break sak lo hrim hrim.
“Ka theihna zawng zawnga khelh ka tum a, ka tum ang taka ka khel thei hi ka lawm.” tiin Swiatek chuan a sawi a, tun season-ah WTA title pali a lakna a ni.
Zverev-a’n Hamburg Open final-ah Laslo Djere 7-5 6-3 in a hneh ve thung a. Darkar hnih tling lo deuhah world number 15 in hnehna a chang.
Inhliam avanga a lansarh loh thin hnuah Zverev chuan a champion leh thei chu a lawmzia sawiin, “Thla 18 hi a rei viau a, chuvangin tunah hian ka lawm tak zet. A vawikhatna atana champion ang mai kha a ni.” a ti.