Aizawl : ZPM President Lalliansawta chuan kumin MLA inthlanpui lo awm turah an party aiawha in candidate tur an puan fel tawhah seat chang lo avanga rilru na tlema zawng awm mah se, tunah erawh party in harsatna an neih tawh loh thu a sawi.
Thawhtannia ZPM-in an pisa-a chhung inkhawm an hmanah thu sawiin Lalliansawta chuan, “Candidate 39 kan puang fel tawh a, hengho zat aia tam fe seat beisei, chang ta lo an awm. Seat chan loh avanga rilru na tlema zawng an awm a, tunah erawh Party-in harsatna kan nei tawh lo,” a ti.
Politics chu khuai rau ang deuh a nih thu sawiin Lalliansawta chuan, “Kalna lam tur pan tur zawnga thlawk, hnunglam hawi zawnga thlawkte an awm bawk a; mahse, an liam duak a, an awmna tur lam an pan fel leh vek thin. Mi kal loh dan deuha kalte pawh an thahnemngaih dan a dang a ni mai a, mi tangkai tak an ni fo thin,” tiin, zingah ni a chhuah dawnin a chhuahna lai tur a sen phut mai a, hai rual a ni ngai lo. Chutiang chu ZPM dinhmun a nih thu a sawi a. Khawi ilo kalna apiangah ZPM sorkar ring an inchibai a, an inkawm a. Mipui ngaihdan la tute chetvelna nen a ram pum huapin ZPM chanchin an sawi mur mur mai niin a sawi.
Lalliansawta chuan, khaw tha tak pawh hi khawchhiain a tihbuai chang a awm fo thin. Mahse ZPM chuan beisei leh tawngtai chungin an dil a, rim takin an thawk mek tih sawiin, “Chaponain hmun a chang tur a ni lo va, thawhrimna hi kan hlawhtlinna tur a ni. Kan candidate-ten an thawkrim em em a, sorkar an tumna kawnga an innghahna lian ber pakhat chu thawhrimna hi a ni,” a ti bawk.
Block hrang hrang leh Unit-ten candidate-te tih hautak loh tumin an inhlawh a, chumai ni lovin sum leh paiin an tanpui hial zawk tih sawiin ZPM President chuan, “Mi tam takin candidate-te sum an dil thin a, hei hian inthlan senso a tihautak em em thin a ni. Kalphung tharah erawh diltu ni lovin petu zawk kan nita mek hi a tha zawnga inthlanna kalphung her danglamna ni turah ka ngai a, hetiang hi Mizoram Politics-ah thil thar a ni hialin ka hria. Kalphung thar mipui sorkar din kan tumnaah Mizoram mipui zawng zawngte party sawi lo va thawkho, tangrual vek turin ka sawm che u a ni,” a ti.
ZPM chhung inkhawm hi ZPM Adviser H Lalduhawma’n a kaihruai a ni.