- Ruata
Tata SUV zinga tunhnaia hlawhtling ber tia sawi theih Tata Nexon chu hmel thar nen a chhuak thar dawn a, 2023 Tata Nexon hi company lam chuan ruahmanna an kalpui mek a, an tihchhuah hun tur a la hriat theih loh a ni.
Tata Nexon hi tarlan tawh angin India rama sub-4 meter SUV huangah hralh a kal em em a. He huangah hi chuan SUV hralh hnem ber a ni. A khan sang tak leh khawl inthazo tak a neih te hi mite duh chhan a ni a, hei bakah hian a changkang em em a, a man nen engkim mai hi lirthei leitute duhthusam a ni a. India rama company rintlak leh hlun tak Tata siam a ni bawk a. India ram chuan he SUV hi a duh em em a ni.
Tata Nexon hi kum 2017 atang khan tihchhuah tan a ni a. An update hmasak ber chu kum 2020-ah khan niin hetah hian design leh kentel hrang hrang an thlak danglam ve nual a. Tichuan tuna a thar 2023 model lo chhuak tur hi a hmel an thlak vawi thumna a ni dawn ta a ni. Tunah hian company lam chuan enchhinna uluk takin an nei mek a, a landanah danglamna neuh neuh a awm ang a, Curvv concept atangin a design hi an la dawn niin media report chuan an tarlang a ni.
2023 Tata Nexon facelift-ah hian LED projector headlamp thar a awm hmel a, hei bakah hian LED DRL a awm ang a. Grille thar, diamond shaped inserts awm tel a nei ang a, a hma bawr hi tlemin a phek deuh ang a, a hma aiin a design hi a tung deuh dawn a ni. Alloy wheel thar a nei ang a, taillamp thar LED light bar bakah tailgate design thar a nei dawn bawk a ni. Tuna mi pawh a nalh tawh viau a, a thar hi chu tunlai thei ang ber leh changkang thei ang ber a ni ang a, a design pawh a tunlaiin a changkang dawn viau a ni.
Tunah hian a lirthei an enchhin lai emaw khawlaia an tlanpui chhin lai hi hmuhtur a la awm lutuk lo a, hetihrual hian tarlan tawh angin Curvv concept an lo phochhuah ruangam nen a inang viau dawn a ni. Hetah hian two-spoke steering wheel with illuminated logo leh paddle shifter te pawh a tel a ni. Heng bakah hian he SUV thar turah hian 7-inch digital instrument cluster, a hma aia lian 10.25-inch touchscreen infotainment system Apple CarPlay leh Android Auto support bakah a chhung bawr tuaithar te kan hmuh hmel bawk a ni.
2023 Tata Nexon facelift-a thil thar kan hmuh tur lian tak chu 1.2L turbo petrol khawl thar, 125bhp power leh 225Nm torque pechhuak thei hi a ni a. Heti a nih chuan tuna chhuak mek aiin a chak hret dawn tihna a ni. He petrol khawl tharah hian transmission lamah 7-speed DCT (dual-clutch transmission) gearbox duhthlan tur a awm dawn a. 1.5L diesel engine chu a la neih chhunzawm zel ang a, hetah hian AMT gearbox pawh duhthlan theihin a awm chhunzawm zel dawn a ni.
Heng thil thar hrang hrang kan tarlan tak te nen hi chuan Nexon thar tur hi a man pawh a pung hret dawn a, a hma aiin Rs. 20,000 atanga Rs 50,000 in a to belh beisei a ni a. Tunah hian Rs Nuai 7.80 – 14.50 (ex-showroom) man a ni mek a ni.
Company leh media report atang pawhin 2023 Tata Nexon thar tur hi a chanchin kimchang a la tam lo khawp mai a. Tun aia kimchang leh fiah zawkin kan hre thuai turah beisei ila, he SUV tha, mawi leh lar lei tumte tan chuan a nghahhlelhawm viau awm e.