Revenue minister Lalruatkima’n Aizawl khawpui laili Assam Rifles luah ram chhunga LSC neite chu cancel tura hmalak zel a ni a, tun sorkar term tawp hmain LSC-te cancel hman an beisei tih thuthar thehdarhtute hmaah a sawi.
Nimina Aizawl Press Club-a press conference a neihnaah zawhna chhangin revenue minister chuan Assam rifles luah ram chhunga LSC nei zingah an address hriat loh mi pariat vel an awm a, chanchinbu kaltlangin in report a, an LSC-te cancel a nih lohna chhan tur sawi fiah tura an hriattir mek thu a sawi.
AR ram luah meka LSC nei mi pahnih/pathum chu court-ah an kal thu bakah mi thenkhat chuan an LSC chu sorkarah an kir tawh tihte sawiin, a bak court-a kal lo LSC-te chu tun sorkar term tawp hmaa an cancel hman an beisei tih a sawi bawk.
Surveyor-te ram teh tura hruai an nihin pawisa pek an ni thin nia sawi awm thin chungchang zawhna chhangin Revenue minister chuan, hemi chungchang sawi awm thin chu a dik a rin thu sawiin, mipui te chu Surveyor te hnena sum pe lo turin a ngen.
Ruatkima chuan revenue department hnuaia hmalakna leh hmasawnna hrang hrangte sawi bawkin, sorkarna an chan tan 2018 atanga kumin July thla thleng khan house pass 4,504 pek chhuah a nih tawh thu te, sumdawnna atan ram 19, Periodic Patta 853, Land Lease 935 leh Cadastral LSC chu 13,221 pek chhuah a nih tawh thuhsawiin, house pass atanga LSC a siam 14,542 a awm thute, Periodic Patta atanga Garden LSC a leh 266 a awm thute a sawi, ram inpekthuah leh thil dang vanga ram chungchanga intihbuaina awm thubuai 1504 chu chin fel a nih thu a sawi.
Sorkar kum 2018-19 atanga kum kal mek 2023-2024 chhungin Registration Fee atangin Rs 24,74,03,864 hmuh a nih thu sawiin, Stamp Duty atangin Rs 6,58,49,905 leh Land Revenue Tax atangin Rs 11,05,80,730 hmuh a ni a, chhiah atanga sum an hmuh zawng zawng chu Rs 1,03,75,21,788 a tling tih a sawi a ni.
Revenue department a enkawl hnuah Chekbawk House Site Plan chu revise a ni a, plan chhunga plot awm zawng zawngte hi kawng, motor kal theihnain a pawh vek tur a duan niin kawng laih lawk vek a ni tih sawiin, “Revision-ah hian public place tur plot 15 dah a ni,” a ti.
Ruatkima chuan, Bawngkawn Brigade Phase I area chu restrict reng chu hlih a ni tawh a, helai hmuna chengte hnena pass pe turin chak taka hma lak zel a nih thu a sawi a, khuarel chhiatna avanga in leh lo chante chu Ramhlun Sport Complex a an inbenbelna tur ram ruahman sak an nih thu sawiin, mi eng emaw zatin in sain an cheng tawh a, LSC erawh pek an la ni lo a, tunah hian LSC pek tura buaipui mek a nih thu a sawi bakah revenue department hmalakna dangte a sawi bawk.
Minister Ruatkima chuan Mizoram sorkar hnuaia minister hrang hrangten an department chan theuh hmalakna leh hmasawnnate a tahtawlin an puang chhuak thin dawn tih a sawi bawk a, ruahmanna an siam dan chuan kar khatah minister pahnih zelin press conference an nei dawn tih a sawi bawk a ni.