Premier League club Crystal Palace chuan Brazil Under-20 international midfielder Matheus Franca chu Flamengo atangin Pound maktaduai 26 in an la dawn.
Kum 19 mi hi Palace hian hun engemaw chen atanga an ngaihven tawh a ni a, tunkarah an hnenah medical a nei fel tawh.
Franca hian tun Brazilian football season kal laiah Flamengo tan vawi 29 inkhel tawhin goal thum a khung tawh. Palace hian an star player Galatasaray zawm ta Wilfred Zaha hmun ruak luah turin an beisei.
Franca hian Brazilian club Flamengo hi kum 12 mi a nihin an youth team a zawm a, kum 2021 December khan senior team tan a inkhel tan.
Attacking midfielder niin striker hnung chiahah leh central midfielder pangngai anga khel thei a ni bawk a, Flamengo first team tan hian vawi 54 khel tawhin goal 9 a khung tawh.
Palace in tun nipui a player an lakluh pahnihna niin Colombia midfielder Jefferson Lerma an lalut tawh bawk.