Aizawl : Khawzawl District Civil Supplies Officer Office thar chu nimin khan bialtu MLA, Deputy Chief Minister ni bawk Tawnluia’n a hawng a, hawnna inkhawmah hian FCS&CA Minister K. Lalrinliana pawh a tel.
Deputy Chief Minister Tawnluia chuan Khawzawlah DCSO Office hawn a ni ta chu lawmawm a tih thu leh District fuke kim nihna kawng Khawzawl-in a zawh mek zel thu a sawi a. Chief Minister, FCS&CA Minister leh Department a thawktu ten chak taka hma an lakna zarah DCSO Office chu hawn a nih thu sawiin, District thar pathum zinga Khawzawl DCSO hawn hmasakber a ni pawh awmawm a tih thu a sawi.
Tawnluia chuan sorkarin district thar te hmasawnna leh changtlunna a ngaihpawimawh thu sawiin, District tharah district office tam ber chu hawn a ni tawh tih a sawi a. Covid hripui lengin hmasawnna hnathawh tikhaihlak mahse, sorkarin district thar te tuaihnum kawngah hma a la tha thawkhat nia a hriat thu a sawi.
District Transport Office (DTO) leh District Local Administration Office (DLAO) pawh hawn tuma hmalak mek a nih thu sawiin, Khawzawlah FCI Kudam sak mek a nih thu leh Khawhaiah Supply Kudam Rs. nuai 30 man sak mek a nih thu pawh Tawnluia chuan a sawi a. Sorkar term kal mekah mipui nitin mamawh – buhfai, gas, petrol leh a dang te phuhruk kawngah Supply department hnathawh fakawm a tih thu a sawi bawk.
Supply Minister K. Lalrinliana pawhin Khawzawla DCSO Office hawn a ni ta chu lawmawm a tih thu leh District thar dang pahnihah te pawh an hawn chhoh zel tur thu a sawi a. Hmanni lawkah Fisheries Office pawh an lo hawn tawh thu leh Khawzawlah hmasawnna hmuh tur a awm reng chu lawmawm a tih thu a sawi.
Supply Department hnathawh ber chu Zoram mipui ei tur buhfai leh AAY chini buaipui a nih thu sawiin, Supply Minister chuan buhfai chu a vaiin quintal 1,05,000 vel sem chhuah thin a nih thu a sawi a. National Highway zauh hna thawh mek avang leh fur laia truck kal theih loh khawpa kawng chhia awm thin avangtein harsatna an tawk fo tih sawiin, COVID peh fur laia an harsatna tawh te chu Dy. CM in a ngaihtuah thin thu leh an tanrualna leh hotute ngaihsakna avangin tun dinhmun an thleng thei tih a sawi bawk.