Aizawl: Kolasib Synod Conference Hall-a Congress Worker Meet nimina a hman puinaah MPCC Vice President Lal Thanzara chuan mipuiin politics ngaihvena tute hi ram hruaitu tha tih an zirchian a ngaih thu a sawi.
Ram hruaitu tur thlan chungchangah mipuite chu fimkhur tura chahin Lal Thanzara chuan, “Mi thenkhatten politics ka ngaihsak peih lo, ka tel vena chi a ni lo ti thin mah se, politics tha lo avanga tawrhna hi kan zavaia chungah a thleng thei a. Politics kal sual avangin kan ram chu kum 20 chhung a buai a, thlarau mite pawh biak inah an inkhawm thei bik lo,” tiin, politics dik loh avangin ram economy a tla chhe mek a, a tuartute chu mipui tho an nih avangin mipuite chu politics ngaihven a, tute hi ram hruaitu tha tih hi an zirchian a ngai tih a sawi.
Lal Thanzara chuan central lamah All India Congress Committee-te thlazar hnuaiah regional party hrang hrang inzawm khawmte chuan BJP sorkarna titawp turin tan an la chho mek a. BJP do duhho zawng Congress party-in a kuah khawm mek tih sawiin, “Congress party chu nakum India ram inthlanpui lo awm turah kan sorkar ngei dawn a. Hnam hnuaihnung leh sakhaw tlem zawkte tan Congress party hi himna kulhpui a lo ni tawh thin. Mi tin leh sakhaw hrang hrangte inti buai lova zalen taka kan awm theihna turin Congress Party chu a sorkar leh ngei dawn a ni,” a ti.
Mizoramah pawh kuthnathawktute leh miharsa zawkte tan Congress an sorkar leh a ngai tih sawi bawkin, “|ang Puihna hmanga miretheite khai chhuak tur leh a chhe lai siam thatu ni turin chung lamin Congress party hi min buatsaih mek a ni,” a ti bawk.
Inkhawmah hian Mizoram chief secretary kal chhuak ta, Lalnunmawia Chuaungo leh Anggu Lalhmachhuana, Secretary, MPCC ten thu an sawi bawk.