Mizoram Pradesh Youth Congress Committee (MPYCC) President Laltawnliana’n Mizo Kristian chu bum-a awm tawh lo turin a ngen.
MPYCC in sorkar tha leh kalphung dik tih thupui hmanga Sesawng Bazar-ah Street Campaign an nei a. He huna thu sawiin MPYCC President Laltawnliana chuan Mizo kristiante chu buma awm tawh lo tura chahin, “Party thenkhat chuan sum chakna hmangin i vote kha rawn lei an tum dawn, in chhungkua rawn lei an tum dawn, thenkhat chuan an tawngkam thiamna hmang leh, enchhin tih thupuia neiin in vote rawn lei an tum dawn. BJP sum an rawn hmachhuan mai thei bawk. Chumi hunah chuan fing tak leh Lalpa hre rengin lo awm ang che,” a ti.
Mizoramah Mizo chauh an awm loh avangin BJP hian BJP angin seat hnih khat chu lak theihna remchang an nei ve mai thei tih sawiin Laltawnliana chuan, “BJP hming lovin seat tam tak an la thei bawk tih kan hriat a tha. MNF te hi BJP thawhpui chiang taka kan hriatte an ni a. MNF i vote chuan BJP i vote tihna a ni,” a ti.
Laltawnliana chuan BJP thawhpui chak em em ZPM an awm bawk tih sawiin, “Pu Duhoma’n Mizoram-a kan sorkar chuan BJP-te nen hian thianah kan insiam tho tho dawn a tih kha kan la hre vek ang. Thla hmasa lawk khan Guwahati-ah Pu Duhoma hi zinin Mizoram BJP hotupa nen an zuk inhmu a ni,” a ti bawk.
State danga Hindu ngeite paw’n BJP sorkar chu India sawpchhe tu leh sakhaw zalenna pawngsualtu an nih thu te leh BJP MP-te ngei pawhin BJP-ten sakhaw tenau-te an nghaisak dan chu duh lovin BJP an sawi chhiat tawh lai a, Mizo Kristian-te berin BJP an lo la thawhpui te, BJP party-ah an la awmte leh BJP thawhpui an la chak em em mai te hian ngaihtuahna a ti thui hle tih sawiin, “Kan zalenna hi kan hralh a ni tih hi an hre lo a. An harchhuah hunah chuan a tlai tawh lutuk ang tih a hlauhawm hle a ni,” tiin MPYCC President in a sawi.