Brazilian midfielder Fabinho chuan Liverpool chhuahsanin Saudi Arabian club Al-Ittihad chu a zawm fel a, an hnenah kum thum contract a ziak.
Kum 29 mi hian Liverpool in tunhnai a Germany a training camp an neihah a team hi a zawm ve lova, Saudi club in Pound maktaduai 40 a lei an dil hnuah first team ah hian telh a ni lo.
Singapore a pre-season inbuatsaihna a an zin pawhin Fabinho hi an hruai tawh lova, a insawnna ti fel turin hun an pe.
Ram tana vawi 29 khel tawh Fabinho hian kum 2018 July khan AS Monaco atangin Pound maktaduai 39 in Liverpool hi a zawm a. An tan vawi 219 inkhelin goal 11 a khung.
Reds midfield leh tlarhnungah player tangkai niin Anfield a a inkhelh chhung hian Premier League, UEFA Champions League, FA Cup, League Cup leh FIFA Club World Cup te a lakpui hman.
Fabinho chuan kum nga chhunga a inpui ni tawh club a chhuahsan dawn tih a sawi a. Liverpool tana inkhelh chu a tan thil ropui leh a huntawn a hlimawm ber zing ami a nih thu a sawi.
“Thinlung hlim takin hei hi ka sawi thei. He club hian ka thinlungah hmun pawimawh a chang a, kan kawng zawh zawng zawngah lawmthu ka sawi.” Fabinho chuan a ti.
Liverpool hian tun nipuiah James Milner, Alex Oxlade-Chamberlain leh Naby Keita te contract an pawhsei loh avangin midfielder panga an senior team atangin an chhuahtir tawh a. Alexis Mac Allister leh Dominik Szoboszlai te lalut tawh mahse player bazar inhawn laiin midfielder dang lakluh tumin an la bei mek.