Turkey chhimthlang lam vaukama ram nasa taka kang chuan khualbuk leh chenna in a kan kai hnaih zel avangin khualzinte chu hmun himah suan chhuah an ni.
Turkish Coastguard lawngte chuan mi mal lawngleng leh lawng dang (yacht) hmanga vaukama awmte hmun hima thiar hna chu an thawk niin tual chhung chanchinbute chuan an tar lang.
Bodrum khawpuia five-star hotel pathuma thlengte chu thiar chhuah vek nia sawi a ni.
Ram hi Nilaini atanga kang tan tawh kha niin mi parukin an thih phah tawh.
Inrinni khan mi pahnih an thi tih finfiah leh a ni a. Thite hi Turkey-a Mediterranean leh Aegean vaukam, khualzinten an tlawh nasat tak thin hmuna hmun 100 dawna ram kang mek thelh hna thawktute an ni.
Thuneitute chuan hmun 10-a kang chu an thunun thei tawh niin an sawi.
Bodrum mayor chuan Pathianni tukah pawh khan hmun tam taka la kang mek thlalakte chu Twitter-ah a tar lang.
Tual chhung chanchinbute chuan an chenna bul hnai tlang rama ram kang mekin an chenna a hnaih zel avanga an bungrua kenga tlanchhe lai thlalak tam tak an theh darh a. Engtika lak nge tih erawh hriat mai theih a ni lo.
President Recep Tayyip Erdogan chuan Inrinni khan ram kang vanga mi panga an thihna, Manavgat khua a tlawh a. Sorkar chuan chhiat tawkte chu a theih ang tawka a puih tur thu a hrilh.
Kangmei chhuah chhan hi chhui mek niin chhuitute chuan thenkhat chu hal ngei niin an ngai a, mi pakhat an man tawh.