North Korea chuan tun hnaia United States-in inthian thatna kawnga hmalak an inpeih thu an puang chu ram pahnih inkara innghirnghona awm reng thupna atana lem taka nunchan lantirna niin an puh.
Inrinni khan US hian North Korea chu ram pahnih inkara inthian thatna an siam theihna atan inbiakna kalpui an inhuam thu an sawi a, hei hi an nuclear programme tihtawptir tumnaa an hmalakna pakhat a ni.
North Korea erawh chuan an ngaithei lo a, nimin khan thuchhuah siamin US-in an ram pawh an tum dan chu thil lem lutuk, an ram nasa taka an beihna hliah tumna mai niin foreign ministry chuan a tar lang.
Foreign ministry-in thuchhuah dang an siamah an ram hruaitu, Kim Jong-Un chu Biden-a hian a zahpah lo hle niin an puang a. “Min tithinur a nih vaih chuan kan chhanglet ang tih vawi tam tak US hi kan hrilhlawk tawh,” an ti.
Nilaini khan Biden-a chuan congress-ah president a nih hnua a thusawi vawi khatnaah ram pahnih inkarah palaina thiam tak hmangin North Korea chu nuclear ralthuam siam chhuah an tumna khap theih an inbeisei thu a puang.
May 21-a White House tlawh tura ruahmanna siam, South Korea President Moon Jae-an chuan April thla khan North Korea-a nuclear titawp turin mi dang dang inbe kual lovin, ram hruaitute pahnih inbe mai tura a duh thu a lo sawi tawh.