Senegal forward Sadio Mane chuan Bayern Munich a chhuahsan a, Saudi Arabian club Al-Nassr a zawm.
Kum 31 mi hian tun season liamta khan Bayern Munich-ah bul tan chhe lo mahse beisei angin season a hmang lova, match 38 khelin goal 12 a khung.
UEFA Champions League inkhelah a teammate Leroy Sane nen an intihbuai bawk avangin hrem a tawk a. Team-ah a dinhmun a hmawr phah.
Mane-a man zat hi puanzar ni lo mahse hmun thenkhatah erawh Saudi club hian Pound maktaduai 34 vel an seng nia sawi a ni a. Mane hian kum li contract ziakin kum khatah Pound maktaduai 34 vel a hlawh ang.
Bayern CEO Jan-Christian Dreesen chuan Southampton player hlui chungchang hi sawiin, “Kan zavai leh amah ngei pawhin kan beisei tlan angin kan hnenah hun a hmang lo a ni.” tiin an chhuahtir chhan a sawi.
Bayern manager Thomas Tuchel chuan Mane nen hian inbia in an intha then mai chu an tana thil tha ber nia an hriat ve ve thu a sawi.
“Ngun takin kan sawi dun a, tuna kan dinhmun hi tuman kan duh tlan a ni lo. Chuvangin a insawn hi tha ber niin kan hre tlang.”
“A chang hi chuan ruahman angin thil a kal lo thin a, kan pahnih inkar hi a chhe ngai lova, a insawn tak avang hian engmah a danglam lovang.”
“Kan chhuahtir avang hian rilru natna a nei a nih pawhin ka hrethiam, ka dinhmun ni ta se ka danglam bik lovang.” tiin Tuchel chuan a sawi.
Al-Nassr-ah hian Mane hian Cristiano Ronaldo bakah Marcelo Brozovic, Alex Telles leh Seko Fofana te a khelhpui ang.