Deputy Chief Minister Tawnluia chuan Khawzawl Zuchhip Venga cheng vaibelchhe 4.41 senga sak tur Multi-purpose Community Hall sakna tur lungphum nimin khan a phum.
Hemi puala inkhawm Khawzawl BNRGSK Hall-a neihah Deputy Chief Minister Tawnluia chuan thu sawiin, ram leh hnam a than zel nan khawtlang, vangtlang tana tangkai thil te sorkarin a ngai pawimawh tih a sawi a. District hmunpui Khawzawlin a neih chuan ken tel tam tak a neih thu leh lungphum phum tak Multi-Purpose Community Hall pawh chu district-in a ken tel pawimawh tak a nih thu a sawi.
Tuichang bialtu MLA Tawnluia chuan hall sak hi duhin an ngaihtuahnaah awm thin mah se, sum harsatna vangin duh ang hma lak chak a har tih a sawi a. Project estimate leh DPR te an an siam hnuah Chief Minister-in SASCE atangin Hall sakna tur a pek thu avangin CM chungah lawm thu a sawi a. Hall sa tur hian tender engkim mai dan ang taka kalpui a nih thu leh a bul tan chhoh theih a ni tur chu lawmawm a tih thu a sawi bawk.
Multi-purpose Community Hall hi chhawng thuma sanga sak tur niin, M/s Zothan Consultancy Services, Luangmual, Aizawl in an sa dawn a ni.