ZPM General Headquarters-a Political Affairs Committee Secretary Phairothanga leh a thianten ZPM kal dan zel dan chu ram leh hnam tana tha lo nia an hriat avang leh mipui bum an duh loh avangin ZPM party an chhuahsan.
Phairothanga leh a thiante – PAC member, Zosangliana leh ZPM Adviser Lalmuankima te chuan nimin zing khan ZPM President Lalliansawta chenna inah ZPM primary member atanga an bânna lehkha an theh lut a, Liansawta hnenah hian an party inrelbawlnaah an rilru a dam loh thute an hrilh.
Bânna an theh luh zawha Liansawta in an chhuahsan hlima The Zozam Times-in a kawmnaah Phairothanga chuan ZPM chu mipuiin beisena sang tak nen thlir mah se tun hnaia an kal dan, candidate an inruat leh thil dangahte fuh tawk loa a awm chho nasa a, Pathian ruat loh nia an hmuh tak avangin ZPM chu an chhuahsan ta tih a sawi.
ZPM chhuahsan tate chuan an party hruaitute rorel danah general secretary leh hruaitu dangte an lawm lo a, an rilru a na tlang tih sawiin, anni chu a hmatawng an ni a, mi dang pawhin ZPM atangin bânna an la theh lut zel dawn tih an sawi a ni.
Phairothanga’n bânna lehkha a theh luhah chuan hnam/chi bil politics chawk nung zawnga hma an la ta mai chu tha lo an tih thute, Chakma District Council inthlannaah mipui thawhkhawm Rs 3,50,000 an hmang te, HPC nen inremna September thlaa puanzar tura an siamte chu Kohhran leh NGO-te duh dan kalh a nih thu a tar lang.
Heng bakah hian Val Upa Council thu vawi eng emaw zat an zawm lo te, general secretary-te leh adviser-te rawtna an hnawl thin te hian sorkar hnua an khawsak dan tur a tilang tih sawiin, hengte avang hian a nihna hrang hrang leh ZPM primary member atangin bânna a theh lut ta tih a tar lang bawk a ni.