Aizawl: Mizoram Rural Bank chairman thar, Sheryl L. Vanchhong chuan nimin khan Larsap Dr. Hari Babu Kambhampati chu Raj Bhavan-ah a kawm a, mipuiten awlsam leh tangkai zawka bank an hman theih dan turte an sawiho.
He an inkawmnaah hian Larsap chuan MRB chu Mizoram chhunga bank inzar pharh zau ber anih avangin kawng hrang hranga mi dangte tana awlsamna thlen thintu a nih thu sawiin, mipuite tana tan la zel turin a chah.
Larsap chuan ni tina eichawp zawng te leh khawsak harsa zawkte dinhmun khaichhuah a nih theihna tura sorkar laipuiin ruahmanna a siamte nasa zawka tihhlawhtlin a pawimawh thu sawiin, chungte chu sorkar Department hrang hrangte leh Bank tangkawpin tihhlawhtling thei se a duh thu a sawi.
MRB Chairman Sheryl L. Vanchhong chuan an hmalak mekna leh an thlen chinte larsap chu hrilhin, sorkar laipuiin a ngaih pawimawh em em, PMJDY account chu branch zawng zawngin an hawnsak theih thu te, khawl hmang uar tura inzirtirna ah pawh a thawhhlawk ber bank an nih thu te, mipuite mamawh phuhru zel tura an bank an inhawn thu te a sawi a; larsapin rawtna a lo siamte pawh a remchan ang zela tihhlawhtlin an tum tur thu a sawi bawk a ni.