Myanmar rama sorkar mumal lohna kal zelah Inrinni khan an khawpui lian ber, Yangon-ah bomb a puak a, mipui lungawi loten kawngzawh hmanhmawh tak an huaihawt.
February 1-a sipaiten mipui rorelna an pheh thluk atanga a thla lina hun an hman mekah sipaiten civil mite lakah dimna tel lova beihpui an thlak chung pawhin nimin thleng khan mipui lungawi loten kawng an la zawh chhunzawm zel.
Inrinni bikah kha chuan mipuiten hmanhmawh takin hun an hmang a, sipaiten an man hman loh tur khawpa chakin kawng an zawh.
Min Han Htet, student activist chuan hmanmawh taka kawng an zawh chhan chu venhimna thawktu sipaite laka an bik bo vat theihna tur emaw, thihna leh man an pumpelh theihna tur atana ti an nih thu a sawi.
Yangon-a Insein bial chhunga sikul bulah chawhma dar 10:00 velah bomb a puak.
Chawhnu lamah Yankin-ah vawi hnih a puak leh a. Bomb puak hian sipaite a tiphawklek hle niin helai hmuna cheng mipuiten an sawi.
Nu pakhatin hliam a tuar a, sorkar chuan mipuite tihah a puh.
Yangon leh a chhehvel hmun hrang hranga bomb puak chu eng pawl mahin an tih a nih thu an la inchhal lo.
Monywa khawpui leh Dawei-ah thuziak leh NLD party rawng sen flag kengin mipuiten kawng an zawh bawk a. ‘Monywa hi awp theih a ni lo’ tih leh ‘Mipui rorelna kan duh’ tihte chu an thuziak kente an ni.
Sorkarin man tura an mi zawn thlalak an tar lang angin sipai hotupa, Senior General Min Aung Hlaing thlalak chu hmun hrang hrangah an tar a, ‘Thuneihna atchilhtu’ an ti.