India-a court sang ber chuan Prime Minister Narendra Modi-a sorkarin kum 2019-a India-in a awp chin Kashmir-in ram danpui hnuaia mahnia ro inrelna hran a neihna a hlihsak chungchanga ngenna (petition) a dawnte chu a ngaihtuah tan.
Article 370 hi Hindu nationalist sorkar hian August 5, 2019 khan hlipin Muslim tamna hmun hi tunah chuan sorkar laipuiin a awp mek tawh a. A hmaa ro inrelna hranpa deuh an neih te, flag, criminal code leh dan hran bik an neih zawng zawng a tawp.
Judge panga awmna constitutional bench chuan petition lutte hi an ngaihtuah a, judge zingah hian Supreme Court chief justice pawh telin kum 1947-a India a dindan atanga Kashmir-in status bik a neih chungchang an khel a. Petition-te hi kum 2019-a hlih a nih atanga lut khawmte a ni.
Sorkar hian heng lai hmun hi union territory pahnih – Ladakh leh Jammu-Kashmir-ah then nghalin sorkar laipuiin a awp tihna a ni.
“Kan thubuai hi ram chhunga thiltithei ber, constitutional bench-ah a awm tawh a. Kan dinna hi a nghet tawk tih chu kan innghahna a ni,” tiin petition thehluttu hmasa ber zinga mi, Kashmir atanga MP, Hasnain Masoodi chuan Nilaini khan a sawi a. Ani hi Jammu & Kashmir leh Ladakh High Court-a judge lo ni tawh thin a ni bawk.
“Danin India ram bung khat nia inhung hranna neih min phalsak a. He dan hlih hi inphatsanna leh kan nihna min sawisaksakna a ni,” a ti.
Masoodi-a hi parliament-a Kashmir-a political party lian ber, National Conference aiawha thu mek a ni a, kum 2019-a sorkar thutlukna siam khan India danpui hnuaia ‘kalhmang leh tih dan zawng zawng a bawhchhia’ niin a sawi.
A inhung bikna a hlih hnuah khan Kashmir pum chu India ram dangte ang bawka inenkawlna thuhmun angin, mipuite rawn lem lovin a kalpuio nghal a. Kum 2020-a dan a siamah Kashmir-a kum 15 cheng tling tawh emaw, lehkha zira kum sarih awm tawh emaw chuan mi cheng nghet nihna a nei thei tawh dawn a. Hemi kum vek hian India sipaiten Kashmir chhungah ram an mamawh an nei thei ang a, an mamawh in an din thei dawn bawk a ni tiin thutlukna a siam bawk.
Indian thuneitute chuan mi cheng thar awm phalna chuan chak zawkin eibar dinhmunah a tihmasawn dawn niin an sawi a; mahse, mi tam takin mi cheng sate chim ralna mai mai tur niin an ngai thung.
Kashmiri tam tak chuan pawn lam atanga lut an tam lutuk chuan nghawng tha lo a nei dawn niin an ngai a. Kum 1948-a United Nations thutlukna anga Pakistan-a beh aia India-a beh an thlan chhan kha engmah lo a ni dawn niin an ngai a ni.
Himalaya tlangdunga awm, Kashmir hi hriat hlawh tak a ni ngai lo va; mahse, kum 1947-a British-ten Indian subcontinent an thena India leh Pakistan a pian atangin ram hnihte inchuh a ni zui ta a. Kashmiri inlak hran duh pawl chuan kum 1989 atang khan helna siamin Pakistan lama beh emaw, ram hran nih emaw an sual mek zel a ni.
Kum tam tak ram buai a nih tawh chhung hian mi sang telin an thih phah tawh a. India hian heng lai hmunah hian a sipai maktaduai chanve chuang a dah a. Mihring dikna chanvo humhalhtu leh UN chuan Indian sipaite hian mihring dikna chanvo an palzut nasa niin an sawi a. New Delhi erawh chuan hei hi phain a sipaite chuan ‘mi firfiak leh firfiakna chauh an do’ niin an insawi ve thung.