Aizawl: Mizoram Pradesh Congress Committee (MPCC) President Lalsawta’n, “‘That Loh Theih Lohna Bawm’ lehkhabuah hian tih theih loh tur ka ziak lo va. Kan tih theih ngei tur ka ziak a ni,” a ti.
MPCC hian nimin khan Congress Bhawan-a Wednesday Discussion hunah an president Lalsawta lehkhabu ziah, ‘That Loh Theih Lohna Bawm’ an zir ho a. He hunah Lalsawta chuan Chhuanthar, Baktawnga mite khian That Loh Theih Lohna Bawm an siam thei a. Kohhran Thianghlim pawhin inkhuahkhirhna tha tak neiin That Loh Theih Lohna Bawm an siam a. Mihringin an tum chuan tih theih loh a awm lo va, a that theih a ni, tih sawiin, “Sorkar ber a dik loha mipuiin dik tum tlat hi thil theih loh a ni,” a ti.
Congress president hian ‘That Loh Theih Lohna Bawm’ lehkhabu chhung thua ziak angin sorkar tha siam turin an that lai leh an theih laia an siamthat a ngai tih a sawi a. Mizoramah hian tlak ngam thak khawpa thil tha an tih ngam chuan sorkar tha an siam ang a, tlak ngam hi tlakna a ni lo tih pawh an hriat a tul tih a sawi.
Congress party chuan an mihring puite mitmei ni lovin, khawi hmunah pawh min hmutu pathian mitmei an ven chuan Pathian zarah sorkar tha an siam thei dawn tih sawiin Lalsawta chuan, “ZPM hian VUC mitmei ven tur an nei a. Mihring mitmei ven tur nei ngahte hi MLA/Minister atan kan duh lo,” tia sawiin, Pathian mitmei veng thinte hi Congress party chuan MLA leh minister atan an duhte an nih thu a sawi.
MPCC GS leh Hachhek bialtu ni bawk MLA Lalrindika Ralte kaihhruai inkhawmah hian David Lalrinchhana (Research scholer)-in MPCC President Lalsawta lehkhabu ziak, ‘That Loh Theih Lohna Bawm’ thlir letna hun a hmang a. Lalnunmawia Chuaungo leh Vanneihthanga Vanchhawng ten thu an sawi bawk.