Ultimate Fighting Championship a light heavyweight title contender pahnih Magomed Ankalaev leh Johnny Walker te chu October thla hian an inhmachhawn dawn a. Anni pahnih intawng hian 205 pound huangah nghawng a nei thei dawn.
October 21-ah Etihad Arena-ah UFC 294 neih a ni dawn a, hetah hian fighter hmuhnawm pahnihte hi an innuai ang.
Light heavyweight huangah fighter pahnihte hi title chuh theite zingah an tel ve ve tawh avangin an pahnih intum hian ngaihven a hlawh zual ang.
18-1-1 record nei Ankalaev hi light heavyweight rankings-ah no.2 ni lai niin nikum December thla khanJan Blachowicz nen title kawltu nei lova awm chu an inchuh a. Split draw result niin chak awm lova puan a ni a. Nimahsela kum 31 mi hian round nga chhungin chak zawk ni tura a chet tawk ngeia a hriat thu a sawi.
UFC 294 hi kuminah a inlan leh hmasak ber a ni ang.
21-7 record nei kum 31 mi Walker hi kum nga kalta a UFC a a luh tirh atangin fighter beiseiawm tak a ni reng a. Nimahsela fak hlawh a chet a ngah ang bawkin beisei phak loh a nei fova. Tunhnaiah erawh puitlin lam kawng a zawh nia lang tawhin bout nga chhunga vawi khat chauh a chak hnuah a zawnin vawi thum a chak a. Fighter tha Ion Cutelaba, Paul Craig leh Anthony Smith te a hneh vek.
UFC light heavyweight title hi kawltu nei lovin a awm leh mek a, champion Jamahal Hill chuan hliam na a neih avangin a title hi a chhuahsan a ni.