Aizawl: NGO Co-ordination Committee-in ‘Zo hnahthlak unaute thlavang hauhna’ kawng zawh hlawhtling taka neih a ni chu Mizo mipui zawng zawngte chungah lawmthu an sawi.
Nilaini khan Central YMA Committee Room-ah NGO Co-Ordination Committee chuan kawngzawh neih zawh tak thlirletna neiin an thukhawm a. Thutkhawm an neih zawhah thuchhuah an siamah Manipur-a Zo hnahthlakte harsatna tawh hriatpuina leh tawrhpui nana July 25, 2023 (Thawhlehni) chawhma dar 11-a Mizoram puma ‘Zo hnahthlak unaute thlavang hauhna’ kawngzawh a buatsaihah, an ngenna ngai pawimawh a, Mizoram mipui, sorkar hnathawk, zirlai, sumdawngte leh lirtheia eizawngtuten mahni hna tul kalsana kawngzawhna a an tel avangin hlawhtling taka neih a ni kha Mizo mipui zawng zawngte chungah lawmthu a sawi tih an tar lang.
Kawng zawh ni-a thawhchhuah mai duh tawk lo va, sum leh paia tanpuina Zo hnahthlak unaute tana an thawhkhawmte kha a ropuiin lawmthu an sawi a. Vawiin thlenga thawhlawm lut tawh zat hi Rs. 17,90,723 niin, lo luh belh zel tura beisei a ni bawk a. Heng sum dawnte hi mawmawhna ang zela hman zui a nih thu an tar lang bawk.