Indian court chuan a ram hmar lama kum zabi 17-na hun laia mosque sak tawh chu Hindu temple sak hnan a ni em tih science thiamna hmanga chhui phalna a pe.
Prime Minister Narendra Modi-a bial, Varanasi-a Gyanvapi Mosque hi Uttar Pradesh-a mosque eng emaw zat zinga pakhat a ni a. Hindu pawl lian tak takte chuan tun hmain he hmunah hian Hindu temple a ding thin a, chu chu Mughal-ten ro an rel lai, kum zabi 16 leh 18-na hun lai khan an sak hnan niin an ngai a ni.
Mosque hi India-a cheng zinga 80% vel zel, Hindu-te hmun pawimawh tak pakhat, Kashi Vishwanath Temple bul maia awm a ni a, tun hnaiah rinhlelhna hi a lian zual a. Muslim-te hi India-a mihring tluklehdingawn 1.4 vel zinga 14% pawh an tling pha lo a ni.
Hindu-ten petition an thehluh aiawha Allahabad High Court, Uttar Pradesh-a ding, Vishnu Shankar Jain chuan Ningani khan court hian sorkar hnuaia mi, Archaeological Survey of India-in a hmunhma engmah tichhe lova chhui a phalsak thu a sawi a ni.
“Scientific survey hi dikna hlen chhuah a nih theih nana tul a ni,” tiin dan lam chanchin thar tar lanna, Live Law hnenah a sawi a, hei hi Chief Justice Pritinker Diwaker-a pawhin a sawi dan niin a sawi.
Muslim-te chuan survey neih hi an duh lo hle a, a hmunhma a tichhe dawn niin an ngai ve thung.
Muslim aiawha ngenna thehluttu, Khalid Rasheed chuan mosque committee hian Ningania court thutlukna hi Supreme Court-ah ngaihtuah nawn leh tura tih theihna an nei niin a sawi.
“Dikna hlen chhuah a nih ngei kan beisei a, mosque hi kum 600 chuang ni tawhin kum tam tak Muslim-te tawngtaina hmun a ni tawh,” tiin thuthar lakhawmtute hnenah a sawi.
ASI hian thla hmasa khan an lo survey tan tawh a; mahse, Supreme Court-in a duh dan ngaihtuah tha leh tura thehluh hun a hawnsak avangin a titawp leh rih.
Hemi hma pawh hian Hindu hmeichhe panga chuan tun hmain Hindu temple a lo ding tawh nia sawiin Hindu sakhaw thiltih dilna court-ah an lo thlen tawh bawk.
Gyanvapi Mosque enkawltu, Anjuman Intezamia Masjid Committee chuan survey nei hi kum 1991-a dan siam, sakhaw hmun vawnhim danin a phal loh niin an sawi.
He dan hian sakhaw biakna hmun zawng zawng, Ayodhya-a Ram Janmabhoomi–Babri Mosque tih loh chu August 15, 1947-a a awm dan ang baka engmah kutthlak loh leh thil danga hman loh turin a ti a ni.
Kum zabi 16-na laia mi, Uttar Pradesh tho, Ayodhya-a Babri Masjid mosque hi kum 1992 khan Hindu-ten tichhiain he hmun hi Lord Ram-a pianna hmun niin an chhal a ni.
He thil thleng hian sakhaw thil intihbuaina nasa tak chhuakin mi 2,000 vel an thi.
Kum 2019 khan Supreme Court chuan he hmun hi Hindu temple dinna hmun atan a pe ta a, Muslim-te hnenah mosque an sak vena tur ram a pe bawk.
Hindu-te chuan kum 1940 chho vel atang daih tawh khan Ayodhya-a temple dintir hi an lo duh tawh a. Court thu angin tunah hian Hindu trust-in temple a sa mek tawh a ni.
Kum 2020 khan Modi-a hian temple sakna tur lung a phum nghe nghe a, nakum May vela hawn hman an tum.