Croatia defender Josko Gvardiol chu RB Leipzig atanga lalut turin Manchester City chuan Euro maktaduai 90 in inremna an nei.
Kum 21 mi man tura an inremnaah hian Manchester City hian pek belh tur an nei dawn lova. A man hi Pound in maktaduai 77 a ni a, hei vang hian Manchester United in Leicester City atanga Harry Maguire an lakluhna Pound maktaduai 80 chu British football a defender leina manto ber a la ni ang.
Gvardiol hian kum 2021 atanga a zawm RB Leipzig tan hian vawi 87 a inkhel hman a, an tlarhnungah player pawimawh ber tia chhal ngam a ni.
Tunkar hian England-ah medical nei turin a kal tura rin a ni a, kar hmasa lam khan Leipzig hian a man atan Euro maktaduai 100 aia tlem pawm an tum loh avangin inremna an nei thei dawn lo niin a lang hman.
Manager Pep Guardiola chuan a tlarhnungah veilam zawka ding tur centre-half thar a duh a, Ruben Dias, Manuel Akanji leh Nathan Ake te nei mahse kuminah tlarhnung a defender pathum hman a chin avangin defender thar lakluh a duh a, Croatia defender hi a tana player duhthusam niin mi tam takin an sawi.
Gvardiol an lakluh dawn avang hian Aymeric Laporte-a hma hun erawhin sawi zui a hlawh a, a chhuak mai dawn nia sawi a tam.
Left-back ah pawh mamawh anga chhawr theih Gvardiol hi City in tun nipui a player langsar an lakluh pahnihna a ni dawn a. Chelsea atangin a hnampui Mateo Kovacic chu June thla khan Pound maktaduai 25 in an lalut tawh.