Aizawl: BJP Mizoram Pradesh President Vanlalhmuaka’n Mizoram chu India ram chhung state leh UT zinga leiba nei tam ber a ni tih sawiin, hetiang dinhmuna chhuahtu Congress leh MNF party chu hnawl ngam turin Mizoram mipui a sawm.
Nimina BJP pisaa chanchinbu mi thenkhat a kawmnaah Hmuaka chuan Mizoram chu state leh UT zingah leiba nei tam ber mai ni lovin an sang lawr lak a, hetianga dinhmun tha loa Mizoram a dinna chhan chu state sorkar lo enkawl tawhtu, Congress leh tuna sorkar mek, MNF vang a ni a tih loh theih loh tih a sawi a, “Leiba nei tam state-a chhuahtu party pahnihte hi kumina MLA inthlanpui neih hunah ram mipuiin an hnawl a tul,” a ti.
Tawngkam leh thu chauha hnathawk thiam sorkar ni lovin, a taka hna thawk thei sorkar Mizoramin a mamawh tih sawiin, state thawhchhuah ngah ber leh leiba nei tlem ber state-a Mizoram a inhlan kai theihna atan BJP thlang turin Mizoram mipuite a sawm bawk a ni.
The Zozam Times zawhna chhangin Hmuaka chuan, central-a BJP sorkarin ram hmasawnna tur leh India ram chu ram changkangah chhuah tuma nasa taka hna a thawh thu te, he a hnathawh hi mipuiin a taka an hriat an hlau a, sawiselna tur dang an hriat loh avangin eptu party-ten sakhuana hmangin an bei ta tih a sawi a, “BJP-in sakhuanna engmah a ngaihtuah lo a, sakhua zawng zawng a taka intluk tlan chu BJP foundation zawk a ni,” a ti.