Italy goalkeeper ropui Gianluigi Buffon chuan kum 45 mi niin professional football khelh a chawlhsan thu a puang.
Azzurri in World champion an nih tuma player pawimawh Buffon hian social media kaltlangin a chawlh thu hi a puang a. “Khati zawng kha a ni ta e. Ka tan in engkim inhlan a, keiin in tan ka theihna zawng zawng ka hlan. Kan zavaia hlawhtlinna a ni.” tiin a fans te hnenah lawmthu a sawi.
Buffon hian kum 1995 khan professional football-ah bul a tan a, Parma tan vawi 220 khelin kum 2001 khan Juventus chuan a hunlaia khawvela goalkeeper manto ber ni turin an lei.
Juventus-ah hian Serie A title vawi 10 lai a lak hnuah Paris Saint-Germain zawmin Italy a a kir leh hnuah Juve-ah kir phawtin a hnuah Parma hi a zawm a. An hnenah tun season zawh thleng contract ziak mahse season liamta khan hliamin a tibuai nasa a, vawi 19 chiah inkhel theiin a chawlh thu a puang.
Italy tan hian vawi 176 inkhelin an ram tana inkhel hnem ber a ni a, kum 2018 khan ram tana inkhelh a chawlhsan.
Italy in kum 2006 a World Cup a an champion tumin goalkeeper rinrawl a ni a, hemi kum hian goalkeeper chawimawina FIFA World Cup Yashin Award chu a dawng bawk.