Aizawl: Manipur buainaa Zohnahthlak thite ruang a ruala vui tum chu Ministry of Home Affairs lam atanga ngenna avangin thulh rih a ni a, mitthite sunna hun hman a ni thung.
Manipur buaina avanga thite ruang phumna tura ruahman S.Boljang, Lamka, Churachandpur District hi Meitei tamna Bishnupur dist hnaih-a awm niin, S.Bohang leh Haolai khuaah Nilaini zan atang khan nu hovin thlan hmun tur tlaivar thakin an nghak.
Ruang phumna tura ruahman hi Meite in an ram chin tia hauhvin helaia in phum hi an phal lova, dodal turin an inhawrkhawm bawk. Boruak tangtak karah MHA atangin ni nga chhung nghak rih tura ngenna a awm a, ni nga chhung nghah a nih chuan a phumna tura ruahman pawh chin fel a ni ang tiin Indigenous Tribal Leaders Forum-te an tiam a. Mizoram Chief Minister Zoramthanga pawhin ruang phum hun hi la sawn tlai turin a ngen bawk tih thudawnna chuan a sawi.
Hetianga ruang phumna hun hi sawn hlat ni mah se nimin khan ruang phumna tur hmun Torbung, Kangvai bulah mitthite sunna leh an puala hunserh urhsun taka hman a ni a, mi sang tel an pungkhawm a ni.
ITLF hian ni nga chhung nghah an remti a, mahse phutlet an nei thung a. Ruang phumna hmuntur S Spolbung hi dan anga chinfel sakte, Zofate himna atan Manipur state police tumah hill district-ah dah loh ni se, mitthi-te an phum rih dawn loh rau rau chuan Zofate ruang Imphal hospital mitthi dahnaa la awm zawng zawngte Lamka-ah phurhchhoh ni rawh se, Rorelna hran an ngiat mek hi arang lamain min ngaihtuah sak rawh se tihte, chhan hrang hrang avanga Imphal Jail-a Zofa tang mekte sahimna atan state danga sawn tihte an phut a ni.
He thu buatsaih lai hian Lamka frontline Kangvai lamah chuan inkahna a awm mek a, Imphal damdawi ina Zofa mitthite ruang chu lakchhuah an nih lohna turin Meitei nuho (Meira Paibis) chu damdawi in tualah an pungkhawm bawk a. Tun dinhmunah hian Lamka leh a chhehvel hi boruak a muanawm lutuk lo tih thu kan dawng bawk.