Aizawl : Mizoram Pradesh Youth Congress Committee (MPYCC) President Laltawnliana chuan sorkar lai MNF party in sorkar leh turin sum chakna bak hmachhuan tur an nei tawh lovah a puh.
Ningani khan MPYCC chuan an pisa-ah Aizawl City Youth Block Congress hruaitute nena an hmachhawn hrang hrang te an sawi honaah thu sawiin Laltawnliana chuan, kumin inthlanpui lo awm turah Mizoram mipuite’n Lalsawta kaihhruai Congress party ah rinna an nghat mek tih a lang chho zel tih a sawi a. Hetih lai hian, Zoramthanga kaihhruai MNF sorkar chu Mizoram mipuite’n inthlan lo awm hmain an hnawl fel tawh niin a sawi.
MNF sorkarin Mizoram mipui sum cheng tam tak an khawl khawm tawh hmanga inlei tlin leh hram an tum tih sawiin Laltawnliana chuan, “Ngawi rengin tan nasa takin an la mek a. MNF Party hian eng anga sum tam pawh seng mah se, Mizoram mipui ten an hnawl tawh a ni tih chiang takin kan hre thuai dawn a ni,” a ti.
MPYCC President chuan ZPM party pawh hian a vawrtawp an thleng der tawh tih sawiin, “Nitin maia an hruaitu lawk te bang thawm hriat tur awm reng mai hian, an party chhungrilah nget lian tak, din rei pui tlak tawh lo khawp a lian a awm tih chiang takin a ti lang a ni,” a ti bawk.
Lalsawta kaihhruai Congress party-ah mipui te’n rinna an nghat mek zel tih sawiin, “Mizoram siamtha leh tur hian hruaitu tha, dik leh felfai neih a pawimawh hmasa ber a, a lu ber a dik a, a rintlak bawk chuan, mipui ten zui tlakah kan ngai mai dawn a ni,” tiin Laltawnliana chuan, Congress party chu Mizoram mamawh ang policy nei awm chhun an nih thu a sawi.