Afghan general chuan an rama indona thleng mekah Taliban-in sipaite laka hnehna an chang a nih chuan khawvel himna atan a hlauhawm dawn tih a sawi.

General Sami Sadat-a hi chhim lama Helmand province-a Taliban laka beihpui thlaknaa a kaihruaitu a ni a, an khawpui, Lashkar Gah-ah inbeihna a nasa hle.

United Nations chuan civil mi 40 vel an thi tawh niin a sawi.

Taliban-te hian khawpui hmun tam zawk an la tawh bawk nia sawi a ni.

Inbeihna erawh a la kal zel a, sorkar sipaite hian Lashkar Gah hi helho kuta tluktir an tum lo.

Gen Sadat-a chuan sipaite hi an tlawm a nih chuan Taliban hi khawvel tan an huphurhawm dawn tih a sawi.

Taliban hian Islamist hel pawl dang atangin puihna an dawng nasa hle tih a sawi a, an lian thar leh hi Afghanistan tan chauh lo pawh a pawi dawn tih a sawi.

“Hei hian Europe leh America-a kal firfiak pawl tenau zawkte a tilian dawn a, khawvel himna nasa taka khawih pawi thei tur an ni,” a ti.

“Hei hi Afghanistan indona mai a ni lo va, zalenna leh thuneihna duhtute indona a ni,” a ti.

Taliban-in Helmand province-a huang an zauh hi Afghanistan ram puma hma an lakna pakhat a ni.

United States sipaiten kum 20 zet an awm chih hnuah an chhuahsan dawn mek laiin tun hnaiah he pawl hian beihpui thlakin ram an zauh leh mek.

Helmand hi US leh British sipaiten beihpui an thlakna thin a ni a, Taliban an lian thar leh hi Afghan sorkar tana pawi tak a ni.

Lashkar Gah hi an la a nih chuan kum 2016 hnua province khawpui zinga Taliban-in an lak leh hmasak ber a ni dawn a. Hmar lama Kunduz chu an lo luah zawk tawh bawk.

Hmun tinah ruang!

Lashkar Gah khawpuia chengte chuan hlauhna karah an khawsak thu leh helhovin an lak mai an hlau hle a, thlawhna hmangin US leh Afghan sipaiten an kap reng bawk.

“Taliban-ten khawngaihna an lanti dawn lo va, sorkar pawhin min bomb chawl dawn bawk hek lo va. Khawlaiah ruang a let rum a, civil mi nge Taliban tih pawh kan hre hlawm lo,” tiin mi pakhat chuan BBC a hrilh.

“Khawi lamah nge kal tur ka hre lo va, khawi lai maiah pawh indona a awm a ni,” tiin mi dang pakhatin a sawi bawk.

United Nations Assistance Mission in Afghanistan (Unama) chuan Taliban-in lei lama an nawrna leh Afghan-ten thlawhna atanga an kah chuan civil mite tan tlanchhiatna tur pawh a tiawm lo niin a sawi.

Lehlam lehlam chu civil mite himna ngaihtuah tur leh mi chenna laiah chuan inkap tawh lo turin an ngen.

Thite bakah mi tam tak hliam leh sang tel in leh lo chân an awm tawh niin Unama chuan a sawi.

Lashkar Gah-a doctor-te chuan damdawi pawh an indaih lo tan tih an sawi a. “Kil tinah an inkap bawk si,” tiin pakhat chuan BBC a hrilh.

Afghan tawnglettu pakhat chuan British sipaite tana thawk a nih avangin Taliban-ten an beih mai hlauthawngin a dinhmun a derthawng hle tih a sawi.

“Nimina ka in ka chhuahsan chiah chu Taliban-in lain an luah nghal a, ka awmna an zawt nghal a ni,” a ti.

“Kan hma lam hun sawi thiam a har a, Nato tana thawk an awm leh awm loh in tinah an dap tawp a ni,” a ti.

Hetih lai hian thuneitute chuan Taliban-ten an lo lak tawh, Afghan sipaite hian sorkar TV leh radio station chu an la let leh tawh tih an puang.