Aizawl: P&E Minister R Lalzirliana’n kum 25 chhung MLA leh kum 15 chhung cabinet minister a nih theih avanga Pathian hnena lawm thu sawina hun a buatsaih.
Armed Veng North Community Centre-a hun hmanah hian chief minister Zoramthanga chuan telpuiin lawmpuina thu a sawi a. R Lalzirliana hun tawn chu thil ropui, Pathian malsawmna hlu leh lawm tlak a nih thu a sawi a. MLA nihna kalkawng a hautak tih sawiin, “Mi vannei, mite duhsak tlak leh taksa hriselna lamah pawh malsawmna dawng nih a ngai thin,” a ti.
R Lalzirliana pawh thu sawiin, a hun tawn zawng zawngte chu Pathian remruatna leh malsawmna zarah lo thleng a nih thu a sawi a. Lawmpui tura kal khawm zawng zawngte leh a lo thawhpui thin zawng zawngte chungah lawmthu a sawi.
R. Lalzirliana hi kum 1998, 2003, 2008, 2013 leh 2018 General Election-ah te khan Saitual/ Tawi Constituency atangin thlan tlin a ni.
A lawmna hunah hian Minister leh Member of Mizoram State Legislative Assembly ni mek leh lo ni tawh engemawzat leh sawm bik mi thahnem tak an tel a ni.