France international defender Axel Disasi chuan Chelsea chu AS Monaco atangin Euro maktaduai 45 in a zawm.
Kum 25 mi hian kum ruk contract a ziak a, Stamford Bridge-ah hian centre-half neih belh mamawhna chu Wesley Fofana khup hliam avanga a chawlh rei dawn avangin a nasa zual.
Season liamta khan Disasi hian Monaco in league match an khelh zawng zawngah a khel kim vek a. France tan vawi li inkhel tawhin 2022 World Cup final khan substitute bench atanga dah luh a ni.
“He Chelsea team zing ami ka ni thei hi ka lawm hle a. Helai hmunah hian hlawhtlinna tam tak neih ka inbeisei. Trophy tam tak lak a, club in tum a neihte a hlenna turin theihtawp ka chhuah ang. Tum sang tak ka nei a ni.” tiin Disasi chuan a sawi.
Tun nipuiah Chelsea in player an lakluh parukna a ni a, Christopher Nkunku, Nicolas Jackson, Lesley Ugochukwu, Angelo Gabriel leh Diego Moreira te an lalut tawh.
Mauricio Pochettino hnuaiah hian Thiago Silva, Trevoh Chalobah leh Levi Colwill te nen inkhelhna hmun an inchuh dawn a. Fofana inhliam avangin a chawl rei dawn a, a hnampui Benoit Badiashile pawh inhliam avangin season bul a tan thei dawn lo.
Disasi hian kum 2020 August khan Stade de Reims atangin Monaco hi a pan a, Monaco tan hian vawi 129 inkhelin goal 10 a khung hman.