India ram hi kum sang tam takah khan ram ropui tak, ei leh barah pawh intodelh, sakhuaah pawh Hindu sakhaw betute awmna a ni a. Mahse, khawvel inher danglam zelin he India ropuina hi a chim pil bo vek a. Chumi hnuah ram hrang hrangin rawn runin a tawpah British in a rawn awpbet ta a ni. Khawvela civisation ropui Indus valley civilisation te, Ganges valley civilisation te thlir kirin he hindu sakhaw betute hi an ropui em em a. Khawthlang nun hian vawiin ni thlengin he India ram hi a la ti pherh reng a. Chuvangin hindu lalram ah khan kan kir lehin ram ropui takah kan insiam chho leh dawn a ni. Chumi thleng tur chuan hindu sakhaw betute awpna hnuaiah India hi a awm leh tur a ni a. A mipui pawhin hindu sakhua hi kan zawm vek tur ani tih hi BJP leh sangawizawnpuite thupui a ni.
Chu dinhmun thleng tur chuan kum tam tak atang khan hma la tawhin nakumah hian bjp thurualpui RSS phei chuan an kum 100na an lawm dawn a. Chuti khawpa hindu lalram din tuma an lo beih tawh chu BJP hian rawn kalpuiin hindu ho hian an atchilh ta a. A taka an tum ram thleng tur chuan bjp sawrkar chuan India ram dante chu sawrkarna an siam atangin an duh ang tihhlawhtlinna tur remchang hawi zawngin an her ta ngat ngat a. Ram rorelna khawl Parliament ah a tam ber an nih avangin an duh dan danin an pass ta zung zung mai a ni.
An dan siam chuan keini kristiante leh muslimte chim ral kan nih theih dan turin ziakin ram dan an dah chho mek a. Sawrkar dan, zawm loh theih loh ni siin kan kal chho tan ta mek a ni. Kristiante thurin ram tinah kal ula, chanchintha hril rawh u tih chu Anti conversion law hmangin an khap chho hret hret a. Muslim ten an sakhuaa an kalpui triple talak an tih mai, nupui pasal inneihna / inthenna dante chu khawih danglam sak an ni chho ta a. Sakhaw tenau zawkte tan chuan reiloteah he India ramah hian a chet hleih theih tawh dawn loh a ni.
Khawchhak lam ramri hmawr lam deuha awm hnam tenau ten India danpuia awm kan ram chungchanga thuneihna kan neihte chu an ngaimawh ta em em a. Danpui hmang vekin kan ram ngaw chunga central sawrkarin thu a neih theih dan tur forest amendment bill 2023 pawh an passed leh ta rup mai. He dan hnuaiah hian international border atanga boruaka teha km 100 chinah central India sawrkar chuan defence chhuanlamin hmasawnna leh development reng reng state sawrkar rawn lovin hma a la thei dawn ta a ni. 100 km hi tehin Bangladesh leh Burma atanga teh chuan kan ram khawi lai pawh hi a huam pha vek bawk. Chuvangin kan thuneihna a awm tawh dawn lova. Kan ram hi kan ram ani tawh dawn lo. A nihna dik takah chuan mi rama insa ve ang chauh kan ni dawn ta.
Hetiang hi central sawrkara rorel mek bjp kaldan chu a ni a. An thuhnuaiah kan awm lo thei silo. Kan ram an rawn suasam dan tur ngaihtuah hian mizo hnam hmalam a thim mup mai niin a hriat ta a. Nimin mai khan hetianga hmalakna chungchangah hian mizoram congress preaident Pu Lalsawta chuan kan rama kohhran, NGO leh party zawng zawngte chu bjp do tur hian tanrualpuiah a sawm ta hial a. Political party pakhat president thusawi chu ani ngei mai a. Mahse, a sawitu en lova, a thusawi enchianga kan ram mipui, kohhran hrang hrang, community organisation zawng zawng chuan ke pen a hun hle mai. Mizoram hi a hming chauh hi a awm ang a, a chhunga mizote hian neitu nihna kan neih mumal tawh siloh hun hi a taka a thlen loh nan kan ram mipui hian he party hi kan do a va hun em. Thuneitu an nih avanga be tha mai lovin, kan ram rawka chimral tum pawl hi kan theihna zawng zawngin i do ang u.