Mizoram State Law Commission-in inneih chungchang dan siam thatna tura rawtna a pawm zingah biak in thleng lova man leh mual inhlan chu inneihna puitlingah pawm nise tih a tel.
MSLC meeting vawi 42-na chu nimin khan an Chairman Lala Khobung hovin a office chamber-ah neih a ni a. ‘Mizo Inneih, Inthen leh Rokhawmna Dan, 2024’ siam that chungchang sawiho a ni.
He dan chungchanga rawtna hrang hrang an thlir hi a, an pawm langsar zingah ‘Mizo’ tih dan dinglaiin a hrilhfiah chu sawr zim hret a ni a. Inneihna chungchangah tihdan pangngai, biak ina kut insuih la kalpui thovin biak in thleng kher lova mizo dana man leh mual inhlan chu inneihna tlingah pawm nise, tihte a tel a ni.
He dan hi law commission hmasa bera Chairman R. Lalrinawma, Ex-Dy. Speaker hova buaipui niin, a hnua chairman, John Siamkunga, Ex-MLA hova zut mam lehin, kum 2014 khan Mizoram Legislative Assembly chuan hman theih turin a pass a. Feb. 13, 2015 atanga hman tan a ni.
He dan hi siam that ngai nia hriat a nih avangin law commission pathumna, Chairman Lala Khobung hovin en zui a ni a. Siam that rawtnate pawh CYMA, MHIP Gen. Hqrs. bakah mi mal atangte-a dawn a ni.