Mizoram Pradesh Congress Committee (MPCC)-in nimina Congress Bhawan-a Friday Political Session an neihah an vice president, Lal Thanzara chuan MNF-te nationalism an sawi leh Congress-in nationalism a sawi a inang lo niin a sawi.
MNF sorkarin Mizoram a thlenpui theih awmchhun chu leiba ngah ber state nih a ni tiin, “Heti chung hian ram tana tangkai lo, PAHOSS an sem a, nuai thum tiamin Rs. 25,000 an sem nel nual a,” tia sawiin Lal Thanzara chuan, MNF chu nationalism sawi chungin damlo pawisa leh sorkar hnathawk hlawh an batsak a, nationalism sawi chungin Zohnahthak unaute nasa taka sawisatu BJP an thawhpuina an chhu chat ngam lo a, MNF-te nationalism sawi leh anni nationalism sawi hi a inang lo tih a sawi.
Lal Thanzara chuan an party president, Lalsawta’n thahnemngai takin Mizo hnam leh sakhua him nan Mizoram-a political party zawng zawng te, kohhran leh NGO te chu Kristian sakhaw nepchep tumtu, BJP dopui turin a sawm ngam laiin, inthlan hun atana BJP pawisa leh an chakna chhawr tangkai tum ZPM chief ministerial candidate hian BJP do turin Mizoram mipui ngen ngam lo niin a sawi.
Kumin kum tawpa inthlan tur hi Mizo hnam leh sakhua awm zel dan tur hriltu a ni dawn tih sawiin MPCC vice president chuan, “Tunah hian state hrang hranga kohhran leh para-church hnuai missionary-te dinhmun a him lovin harsatna hrang hrang an tawk nasa zual hle a. Hindu sakhua chawi vung tuma BJP hmalakna hi a tak taka kan vei a hun tawh takzet,” tia sawiin, Mizo sakhua leh hnam himna turin thawk thei party thlan a ngaih thu leh, party-a awmna thlan dik a tul thu a sawi bawk.
Bhawan Friday Political Session hi Lalhruaitluanga Bawitlung, MPCC Secretary in a kaihruai a ni.