Morocco in an World Cup khelh hmasak berah round of 16 an lut nghal a. Ningani khan Colombia nen Group H a an inkhel hnuhnung berah inhmachhawnin 1-0 in hnehna an chang.

Perth Rectangular Stadium a inkhelah hian Morocco in halftime dawnah Anissa Lahmari goal khung hmangin hma an hruai a. Penalty an hmuh chu khung lo mahse goal an khung ta tho.An tlin nan hian hnehna chan ringawt a tawk lova, inkhel lehlamah South Korea in Germany an chelh avangin Morocco an tling ta a ni.

Colombia hi tlawm mahse goal difference-ah an san zawk avangin group hmahruaitu an ni a. Thawhlehni hian Jamaica nen round of 16 an khel dawn a, Morocco hian France an hmachhawn ve thung ang.

Morocco coach Reynald Pedros chuan, “Arab ram zinga hmeichhe World Cup round of 16 khel thei hmasa ber nih hi thil lawmawm tak a ni. Kan tan zan duhawm a thleng.” tiin an chak hnuah a sawi a.

“Germany laka kan tlawm khan min nghawng thui a, kan tumdan angin kan khel lo hrim hrim. Mahse khami hnuah khan kan insiamtha a, player-te pawh an incho phur tawn a, khelh hnih kan la nei tih hre reng chungin theihtawp an chhuah a ni.” tiin 6-0 a an tlawm hnua knockout stage lut tura an insiamthat dan a sawi bawk.

Vawi hnih champion tawh zinkawng a tawp

Kum 2003 leh 2007 champion an ni a, World Cup tan hma a FIFA rankings-ah no.2 an ni. Nimahsela an chesual a, South Korea an hneh theih loh avangin Germany tan World Cup a tawp.

Brisbane Stadium a inkhelah hian South Korea tan Cho So-hyun chuan minute ruknaah goal a khung a, hei hi Germany forward Alexandra Popp chuan sut mahse chakna goal a hnu lamah an khung thei lo.

Tun tum inelna a World Cup khel thei naupang ber record siamtu Casey Phair chuan goal rang tak a khung teuh a, German goalkeeper Merle Frohms a che rang hlauh.

Second half-ah Popp bawkin goal khung mahse offside avanga pawm a ni lo bawk.

Coach Martina Voss-Tecklenburg chuan. “Tun tum chu chhiatna lian tak a ni ber e. Result in a zir lo, kan thawhlehna tur kan thlir a ngai bawk.” a ti.