Aizawl: MHIP Chanmari West Branch building sak that chu Aizawl North III MLA C Lalmuanpuia’n nimin khan a hawng.
Muanpuia chuan MHIP building changtlung taka sak that a ni thei chu lawmawm a tih thu a sawi a, chhungkhat nu ber chu mahni chhungkaw enkawlna atan leh khawtlang nun siam tha tura mawhphurhna sang tak nei an nih thu leh hemi hi hre chunga chhungkaw enkawl turin a chah a. Mizo zingah central services-a in ziak tling an awm thei ta mang lo chu veiawm a tih thute hemi lam hi nu ho in tih tak zeta an vei chuan awmzia a neih ngei a beisei thu a sawi.
MHIP building sak that hawnna inkhawm hi MHIP Chanmari West vice president C Lalremruati’n a kaihruai a, khual zahawm Ward No 6 Corporator John Zosangliana Ralte, MHIP general headquarters President Ngurmawii Sailo ten thu an sawi bawk a ni.
MHIP Chanmari West Branch building sak that nan hian Rs. nuai 12 chuang sum sen a ni a, bialtu Muanpuia MLA fund Rs. nuai 10 hman niin, corporator leh ram hruaitu dangten sum an thawh bawk a ni.