Aizawl: Vairengte-a Netaji Subhash Chandra Bose Avasiya Vidyalaya Hostel chu Serlui bialtu MLA Lalrinsanga Ralte, Vice Chairman, Rubber & Allied Crops Development Board ni bawk chuan a hawng.
Hawnna inkhawmah Lalrinsanga Ralte chuan Vairengte chu a bul vela khuaten zirnaa an pan ber a nih thin thu sawiin, hostel hawn thar tak chu mi harsa zawkte tan leh Vairengte leh a chhehvel khuate tana tangkai tak, malsawmna thlentu a nih ngei a rin thu a sawi a. Hostel thar hawn a nih takah chuan Vairengte leh a bulhnai khuaa zirlaite tan an zirna kawngah pawh hmasawnna a thlensak ngei a beisei thu a sawi bawk.
Serlui bialtu MLA chuan a bialah zirnain hma a sawn theihna atan theihtawp a chhuah thin thu a sawi a. Education Minister Lalchhandama Ralte hmalakpuina zarah Serlui bial chhunga zirna in awmah te pawh zirtirtu indaihlohna phuhru turin zirtirtu dah belh zel an nih thu leh zirna inte pawh a theih ang anga tihchangtlun mek zel an nih thu a sawi.
Vairengte-a Netaji Subhash Chandra Bose Avasiya Vidyalaya Hostel thar hawn tak hi zirlai hosteller mi 30 awm theihna tur niin, tunah hian warden leh accountant te telin thawktu tur, an vaiin mi pasarih lak fel an ni tawh.