UEFA Champions League khel tur Newcastle United chuan Southampton right-back Tino Livramento chu Pound maktaduai 40 vela lalut turin inremna an nei.
Kum 20 mi hian kum 2021 khan Chelsea atangin Saints hi a zawm a. Tun season liamta khan Southampton hi Premier League atanga an tlak hnuah a chhuahsan dawn.
Chelsea chherchhuah England Under-21 defender hian Blues tan first team football a khel hman miah lova. Nikum April thla khan a khup hliam avangin hun rei tak a chawl a, tun season liamta khan Saints tan hian vawi hnih chiah a inkhel a, an inkhel hnuhnung pahnihah Brighton leh Liverpool te a hmachhawn ve thei chauh.
2021-22 season khan Saints tan hian vawi 32 inkhelin an player tangkai a ni thung.
Livramento hi right-back bakah mamawh dan angin wing-back leh right midfield a khel thei a ni a. Hei vang hian tlarhnung a pali inrem leh defender pathum hmanna tactic-ah a tangkai avangin Magpies hian an duh tel.
Tun nipuiah Newcastle hian Italy midfielder Sandro Tonali leh England winger Harvey Barnes te an lalut tawh a. Eddie Howe-a pawlte hian August 12-ah Aston Villa mikhualin league season bul an tan ang.