Aizawl: Zirtawpni chawhma khan DIG Northern Range Lallianmawia kaihhruainain Mizoram Police hotute leh Central YMA hruaituten ruihhlo chungchang leh kuhva rah hmanga sumdawnna chungchang an sawi ho.
Mizoram Police Conference Hall PHQ-a thutkhawmah hian Mizoramin ruihhlo avanga harsatna a tawh mek leh ruihhlo tam tham tak man anih thin chungchanga thawhhona tha zawk neih zel a tul thu te, ruihhlo avanga buaina leh harsatna tawh mek hian khawpui chauh ni lo, thingtlang kilkhawr ber thlenga a fanchhuah tak avangin awmze nei zawka ruihhlo do anih theih nan te, drugs lo luhna district hrang hrangah te nasa zawka tan lak ho zel anih theihnan thawhho zel tha an tih thu an rel.
Hei bakah ram pawn atanga kuhva ro lo lut avanga harsatna tawh mek sawiho a ni a, tanlak tlan zel tha an ti bawk.
Thutkhawmah hian DIG Northern leh Eastern Range bakah Aizawl, Champhai, Kolasib, Mamit, Khawzawl, Saitual SP te an tel.