China hmarchhaka ruah tam tak sur leh tui chim chin sang zel avangin khawpui tam tak an buai a, Asia khawmualpui chhak lama ruah sur nasa kal zel avang hian mi sang tam tak hmun himah sawn chhuah an ni.

Philippines leh Taiwan a nuai hnuah Typhoon Doksuri hian Thawhtanni khan China khawpui, Beijing a nuai a, chhiatna tam tak a thlen.

Zirtawpni khan kil thum atanga Beijing khawpui hualtu, Hebei province-a khawpui tam takah inralrinna dar khawn a ni.

Haihe River Basin-a lui lian 13 chu hlauhawm chhinchhiahna chungah a luang a, heng zingah hian Beijing, Tianjin leh Shijiazhuang pawh a tel tih Xinhua news agency chuan Thawhtanni khan Ministry of Water Resources thuchhuah a tar lang.

Shanxi province atanga Hebei khawthlang thlengin mi 42,000 chuang hmun hima thiar chhuah an ni tawh bawk.

Grain thar chhuak tam, hmar lama Heilongjiang province-ah pawh khaw eng emaw zat chu an vai vaia thiar chhuah ngai an awm bawk a. Ruah sur nasa leh tui lian hian Shangzhi khawpuiah power a tiawm lo bawk a, bazarpui tam tak chu an buai phah hle.

Heilongjiang-ah hian Zirtawpni khan ruah tam tak sur leh thli na tak tleh thei te, hmar lama Qiqihar-a ruah sur nasa tur te sawi lawk a ni.

Province hian tlang rama lei min mai thei te, khawpui leh thingtlang khuaah pawh tui tling te, lova tui tling te a tam a, hei hian chhiatna a thlen thei tih an sawi bawk.

Beijing chhimthlang, Zhuozhou-ah pawh hmun hlauhawma awm mi 1.25,000 chuang chu hmun himah sawn chhuah an ni bawk tih Xinhua chuan a tar lang.

Beijing khawchhak lama lawng chawlhna khawpui, Tianjin-ah pawh Yongding River lian avangin mi 35,000 chuang hmun himah sawn an ni bawk.

China-ah khuarel chhiatna tam

Chinese President Xi Jinping-a chuan tual chhung sorkar zawng zawngte chu chhanchhuah hna thawhnaah ‘a zawng zawnga che chhuak turin’ a ti a. Nunna a tlem thei ang ber chân a nih theih nan tan la turin a ti.

Beijing daiah chuan mi 20 vel an thi tawh a, kartawpah khan tui lian thut avangin mi 27 chin hriat lohvin an awm tawh bawk.

Hmun tam takah power a awm lo va, vantlang inkalpawhna hmanrua leh nipui sikul kal pawh tihtawp rih niin mi maktaduai 20 chuang chenna khawpuiah hian ina tawm tura intih a ni.

Inrinni kal ta atang khan hmun thenkhatah ruah hi mm 500 (inches 20 dawn) a sur tawh niin Hebei province weather agency chuan a sawi a. Hmun thenkhatah phei chuan darkar khatah mm 90 (inches 3.5) vel a sur.

Hetih lai hian Chin ram hmun thenkhatah chuan khua a kheng mek ve bawk a. Russia-in Ukraine a rûn avanga ei tur inthawnna a buaithlak bawk si avangin an rama mihring tluklehdingawn 1.4 vel chengte zinga tam tak chuan ei turah buaina an nei mek.

July thla tirah khan chhimthlang lam, Chongqing-ah tui lian vangin mi 15 an lo thi tawh a, hmarthlang lama Liaoning province-ah pawh mi 5,590 zet hmun hima sawn chhuah an ni a. Ram laili, Hubei province-ah pawh ruah nasa tak sur avangin lirthei leh inah mi tam tak an tang bawk.