Bangladesh-a Nilaini chawhnu lama inneih lawmnaahah second rei lote chhunga tek tam tak tla avangin mi 16 an thi a, mi neitu pawhin hliam a tuar.
Heng mite hi lawnga luipuia an awm laiin tek a tlak nasat em avangin lui kam khua, Shibganj-ah kai tumin lawng an chhuahsan chiah a, tek hian a deng ta niin thuneitute chuan an sawi.
Mo hi hetih lai hian a awm lo niin Sakib Al-Rabby chuan news agency AFP a hrilh a. Khawthlang lama Chapainawabganj district-a reilo te kara tek tla avang hian mi 16 an thi tih an chian tawh thu a sawi bawk.
Bangladesh ram hi furpuiin a nuai mek a. Ruah nasa taka surin chhimchhak lama Cox’s Bazar pawh chhuin lei min leh chhiatna dang avangin mi 20 an thi a, an zinga paruk hi Rohingya raltlan an ni.
Kum tin tek tla avang hian Asia chhim lam ramah hian mi za chuang an thi ziah.
Thuneitute chuan kum 2017 khan tek den vangin mi 200 chuang an thi a, hemi kum May thlaah hian ni khatah mi 82 zet an thi tih an sawi.
Tekin a den hlum tam tak hi chhinchhiah loh an ni fo va, a hranpaa chhinchhiahtute chuan mi 349 an thi niin an sawi.
Mi thiamte chuan ramngaw thiah chuan khuarel chhiatna a thlen nasa niin an sawi a, Bangladesh hian sik leh sa inthlak nasa lutuk tihziaawm nan leh tek tla nasa lutuk tihtlem nan tum phun beihpui an thlak.