Afghanistan-a media & information centre director chu Taliban helhovin an khawpui, Kabul-ah an that.

Tual chhung chanchinbu, Tolo chuan Dawa Khan Menapal-a hi an khawpuia Darul Aman Road-ah silaia kah hlum a nih thu a tar lang.

Afghan sorkar dinhmun tar lang thintu leh Twitter-a zuitu 1,42,000 chuang nei a ni.

Taliban hian Kabul-ah vek hian defence minister chenna in pawh an bei tawh a, a tuk lawkah sorkar mi pawimawh tak an that zui.

Nilaini zana minister chenna in an beih kha kum khat dawn hnua an khawpi bera bomb puak lian ber a ni a. He thil thlen hnuah hian sorkara mi langsarte an beih zui tur thu an sawi zui nghal.

“Vanduaithlak takin firfiak nunrawng tak takte dawihzep taka chein Afghan hmangaihtu chu a martar a ni,” tiin interior ministry thupuangtu, Mirwais Stanikzai chuan a sawi.

US Charge d’Affaires to Afghanistan Ross Wilson chuan pawi a tih thu leh a barakhaih thu a sawi a. “Heng inthahna hian Afghan mite dikna chanvo leh an duh an sawi theihna chu nasa taka rah beh a ni tih a tilang,” tiin Twitter-ah a tar lang.

Ngaihtuahawm Afghanistan

UN Security Council chuan Afghanistan-a tun hnaia tharum thawhna thleng nasa lutuk chungchangah hian Zirtawpnia thut turin meeting a ko.

Taliban helho hian an ram zau tak la tawhin khawpui lian zingah chhim lama Kandahar, sumdawnna khawpui Herat leh Helmand province khawpui Lashkar Gar te chu an bei mek bawk.

United States leh ram dang sipai awmchilhtute chuan kum 20 zet hnuah an chhuahsan dawn mek a, an inthiar chhuak tan mek.

Ram palaite chuan Afghan sorkar thuneituten an ram buai thar leh mek chungchangah thutkhawm an ngen a. New York-a chawhma dar 10:00 (India-a Zirtawpni zan dar 7:30)-ah an tan.

Ningani zan khan US leh Afghan sipaite Lashkar Gah-a Taliban tanhmunte chu thlawhna atangin an kap a. Sorkar sipaite chuan khawpui pawimawh tak hi chân an tum loh thu leh indona a nasat thu an sawi.

Thuneitute hian civil mi tam tak an thiar chhuak hmasa a, sang chuang erawh khawpui chhungah an la tang mek.

An ram thenawmte pawhin Afghanistan dinhmun sawi tur hian Zirtawpni vek khan thutkhawm an ko bawk.

Kazakhstan, Kyrgyzstan, Tajikistan leh Uzbekistan te chuan Turkmenistan-a Caspian Sea kam, Avaza khuaah kum tina neih thin inbiakna an kalpuiah an sawiho dawn a ni.

Turkmen President Gurbanguly Berdymukhamedov chuan an sorkar TV-a thuchah a sawiah Afghanistan dinhmun chuan mi tin a tilungngai vek tih a sawi niin AFP news agency chuan a tar lang.

Hetih lai hian tun kar chhung khan Russia chuan Uzbek sipaite chu military drill a lo neihpui a. Hei hi helai bawr boruak a ralmuan loh lai, thla hmasa maia Taliban laka Afghanistan leh Uzbekistan ramri kânna khua hloh a nih mek laia a neihpui a ni.

Ningani khan European Union pawhin rang takin, zawm ngei tur leh inkahhai nghet tak puan nghal a tul thu a lo sawi tawh a. Afghanistan-a tharum thawhna thleng mek chu ngaihtuahna fim hmang lova inbeihna niin a sawi.