Hmeichhe boxing a undisputed featherweight champion ni lai chuan amah chotu Heather Hardy chu Dallas-ah a hneh a. A champion kawnghren a humhim.
American Airlines Center-ah kum 34 mi Puerto Rican boxer hian a khingpui in a hnek fuh let a tam dawn a hnek fuh a, round hnuhnung ber thlengin a thunun hneh hle.
Judge te pawhin 99-91, 100-90, 100-90 a point pe vekin unanimous decision in chiang takin a chak.
Serrrano hian hnehna a chan avangin Irish boxer Katie Taylor nen rematch an neih a hun chiah niin mi tam takin an ngai a, nimahsela tunhnaiah mixed martial arts a inel turin Professional Fighters League-ah contract a ziah avangin a chak hnuah a hma hun lam a sawi kai duh lo.
February thla khan Erika Cruz hnehin featherweight boxing champion hi a ni a. Nikuma lightweight huanga a hneh loh Taylor nen rematch nei tura tih an ni.
Mahse a inhliam avangin Chantelle Cameron chuan a thlak a, Cameron hian Taylor hi a hneh zui a ni.
Main event-ah ‘celebrity fight’ thlengin YouTuber boxing luhchilh zui ta Jake Paul chuan UFC fighter hlui Nate Diaz chu 97-92, 98-91, 98-91 in a hneh a. Round 10 an inhnek chhungin round nga naah a khingpui hi a hnek tlu. Diaz hian MMA a intum leh turin a cho zui bawk.