Aizawl : Aizawl West III bialtu MLA Pu VL Zaithanzama chuan zirtawpni zan khan New Capital Complex, Khatla-a Basketball Court chei thar a hawng a, Renovation hawnnaah hian Branch YMA-in Section huap Basketball intihsiak final khelh a ni bawk.
Khatla Branch YMA Basketball Court, New Capital Complex-a mi hi inkhelhna tlak a nih tawh loh avangin MLA Fund hmanga chei thar a ni a, a hawnna hun Branch YMA chuan buatsaihin khual lian Pu VL Zaithanzama, bialtu MLA chuan, ” Thalaite khawvelah Sports hlamchhiah theih a ni lova, ram hmasawn leh hmasawn lo tehna atan sports hi tehfung pawimawh a nih tawh avangin ram changkang a piang sports-ah an sang zel a ni. Kan mil tawkin infrustructure-ah hma kan sawn a ngai a, a pawimawh ber erawh a kheltu mihring hmasawnna tur kan ngaihtuah hmasak a ngai. Sports hi game-ah hmang lovin game hmangin sports-ah hmasawnna thlen kan tum zawk tur a ni” tiin Khatla Branch YMA tana Basketball Court, MLA fund hmanga siamthat chu tangkai taka hman a nih theih nan duhsakna hlanin a hawng a, ruihtheih thilin kan ram nasa taka a run mek karah YMA member leh thalaite fihlim tur leh kan ram siamthatna hna tak tak thawk tura thalaite pawimawh zia a sawi bawk.
New Capital Complex, Khatla-a Basketball Court Renovation hawnna inkhawm hi Pu John Kima, Branch Treasurer chuan a kaihruai a, Pu Lalsailova, Secretary chuan report pein final-ah hian Section II leh III te inhmachhawnin Section II an champion a, lawmmante hi khual lian bialtu MLA Pu VL Zaithanzama hian a sem nghal a ni.